തിരുവനന്തപുരം: ലൈഫ് കോഴക്കേസില്‍ ഇഡി അന്വേഷണം ശരിയായ പാതയിലാണെന്ന് സ്വപ്‌ന സുരേഷ്. കൃത്യമായ അന്വേഷണം നടന്നാല്‍ വമ്പന്‍ സ്രാവുകള്‍ പുറത്തു വരും. കേസില്‍ അറസ്റ്റിലായ ശിവശങ്കര്‍ കൃത്യമായി കാര്യങ്ങള്‍ പറഞ്ഞാല്‍ മുഖ്യമന്ത്രിയും കുടുംബവുമടക്കമുള്ളവരുടെ പങ്ക് പുറത്തു വരുമെന്നും സ്വപ്‌ന സുരേഷ് പറഞ്ഞു.
മുഖ്യമന്ത്രിയുടെ അഡീഷണല്‍ പ്രൈവറ്റ് സെക്രട്ടറിയായ സിഎന്‍ രവീന്ദ്രനെ ചോദ്യം ചെയ്‌താല്‍ എല്ലാ വിവരങ്ങളും ലഭിക്കും. രവീന്ദ്രനാണ് എല്ലാ കൊള്ളയ്‌ക്കും വേണ്ട കാര്യങ്ങള്‍ ചെയ്യുന്നത്. രവീന്ദ്രനെ ചോദ്യം ചെയ്യാന്‍ മുഖ്യമന്ത്രി ഒരിക്കലും അനുവദിക്കില്ല.
കാരണം മുഖ്യമന്ത്രിയും ഭാര്യയും മകനും മകളും ചേര്‍ന്ന് കേരളത്തെ വില്‍ക്കുന്ന വിവരങ്ങള്‍ പുറത്തു വരും. കേസില്‍ താന്‍ ജയിലില്‍ കിടക്കേണ്ടി വന്നാലും സത്യം മുഴുവന്‍ പുറത്തു വരണമെന്നും സ്വപ്‌ന സുരേഷ് പറഞ്ഞു. കേരളത്തെ വിറ്റ് സ്വന്തം സാമ്രാജ്യമുണ്ടാക്കാനാണ് മുഖ്യമന്ത്രിയും കുടുംബവും ശ്രമിക്കുന്നത്. ഇതിന് എല്ലാ സഹായവും ചെയതത് ശിവശങ്കറാണ്.
രവീന്ദ്രന്‍ ഇതില്‍ നിന്നെല്ലാം കൈയിട്ട് വാരിയിട്ടുണ്ട്. ഇത് പുറത്തു കൊണ്ടു വരണം. ശിവശങ്കറിനെ അറസ്റ്റ് ചെയതത് വിഷമമുണ്ടാക്കുന്ന കാര്യമാണ്. കേസില്‍ താന്‍ ജയിലില്‍ കിടക്കേണ്ടി വന്നാലും സത്യം മുഴുവന്‍ പുറത്തു വരണമെന്നതാണ് ആഗ്രഹം. അതിനായുള്ള പോരാട്ടം തുടരും.
ഇത്തരം തട്ടിപ്പുകള്‍ ചെയ്യിപ്പിച്ചവരെ കൂടി ജയിലില്‍ എത്തിക്കുന്നതിനുളള പോരാട്ടം തുടരും. ലൈഫ് കോഴക്കേസില്‍ തന്‍റെ വിവരങ്ങള്‍ ഇഡിക്ക് കൈമാറിയിട്ടുണ്ട്. ഇതിന്‍റെ അടിസ്ഥാനത്തില്‍ കൃത്യമായ അന്വേഷണം നടത്തണമെന്നും സ്വപ്‌ന സുരേഷ് ആവശ്യപ്പെട്ടു. മുഖ്യമന്ത്രിയുടെ ബാഗ് നയതന്ത്രചാനല്‍ വഴി കൊണ്ടു പോയതിലും ക്ലിഫ് ഹൗസിലേക്ക് ബിരിയാണി ചെമ്പ് എത്തിച്ചതിലും വിശദമായ അന്വേഷണം വേണം. ശിവശങ്കറിന്‍റെ അറസ്റ്റിലൂടെ സത്യം തെളിയുമെന്ന പ്രതീക്ഷയുണ്ടെന്നും സ്വപ്‌ന പറഞ്ഞു.
