തിരുവനന്തപുരം: കൊവിഡ് ഇടവേളയ്ക്ക് ശേഷം കുട്ടികൾക്ക് അവധിക്കാല ക്യാമ്പുമായി കേരള സംസ്ഥാന ശിശുക്ഷേമ സമിതി. കിളിക്കൂട്ടം എന്ന് പേരിട്ടിരിക്കുന്ന ക്യാമ്പ് ഏപ്രിൽ 3 മുതൽ മെയ് 25 വരെയാണ് നടക്കുക. 6 വയസ് മുതൽ 16 വയസ് വരെയുള്ള കുട്ടികൾക്കാണ് ക്യാമ്പിൽ പ്രവേശനം അനുവദിക്കുക. രാവിലെ 9.30 മുതൽ 5 മണി വരെയാണ് ക്യാമ്പിന്‍റെ പ്രവർത്തന സമയം.
പന്ത്രണ്ട് വിഷയങ്ങളിൽ ക്ലാസുകൾ: കുട്ടികൾക്ക് ശാരീരികവും മാനസികവുമായ കരുത്തും വൈഞ്ജാനിക അറിവും കലാപരമായ ഭാവനയും വർധിപ്പിയ്‌ക്കുന്ന 12 വിഷയങ്ങളിലാണ് ക്ലാസുകൾ നടക്കുക. നാടകം, നൃത്തം, ചിത്രരചന, സംഗീതം, വയലിൻ, ഗിത്താർ, കീബോർഡ്, തബല, മൃദംഗം, ഡ്രംസ്, സ്പോക്കൺ ഇംഗ്ലീഷ്, കരാട്ടെ, കളരി, കോഡിങ് ആൻ്റ് റോബോട്ടിക്‌സ്, ഗണിത ശാസ്ത്രം, സ്‌പീച്ച് തെറാപ്പി എന്നിവയിലെല്ലാം ക്ലാസുകൾ നൽകും. രാവിലെ 9.30 മുതൽ 12 .30 വരെയാണ് ക്ലാസുകൾ. ഉച്ചയ്ക്ക് ശേഷമുള്ള സമയം കുട്ടികൾക്ക് വിനോദവും അതിലൂടെ അറിവും പ്രധാനം ചെയുന്ന പ്രവർത്തികളാണ്. ഇതിൽ മാതൃഭാഷ ശേഷി ഉയർത്തൽ, നാടൻ പാട്ടുകൾ, മാലിന്യ സംസ്‌കരണത്തിൻ്റെ കടമകൾ, മാജിക്, മോട്ടിവേഷൻ ക്ലാസുകൾ എന്നിവയും സംഘടിപ്പിക്കും.
പ്രവേശനം 6 മുതൽ 16 വരെയുള്ള കുട്ടികൾക്ക്: കിളിക്കൂട്ടം ക്യാമ്പിലേക്ക് പ്രവേശനം 6 മുതൽ 16 വയസ് വരെയുള്ള കുട്ടികൾക്കാണ്. ഇവരെ പ്രായത്തിൻ്റെ അടിസ്ഥാനത്തിൽ മൂന്ന് ബാച്ചുകളായി തരം തിരിച്ചാകും ക്ലാസുകൾ നടക്കുക. 6 മുതൽ 8 വയസ് വരെ ഒരു ബാച്ചും 9 മുതൽ 12 വയസ് വരെ ഒരു ബാച്ചും 13 മുതൽ 16 വയസ് വരെയുള്ള കുട്ടികള്‍ക്ക് മറ്റൊരു ബാച്ച് എന്നിങ്ങനെയാകും ബാച്ചുകൾ തരംതിരിക്കുക. പ്രായത്തിൻ്റെ കൂടിഅടിസ്ഥാനത്തിലാകും ക്ലാസുകൾ ക്രമീകരിക്കുക. എല്ല ദിവസവം രാവിലെ 30 മിനിറ്റ് യോഗയും ആഴ്‌ചയിൽ ഒരുദിവസം ഫിസിക്കൽ ട്രയിനിങും ആഹാര അറിവ് സംബന്ധിച്ച് ബോധവത്കരണവും നൽകും.
ശാസ്ത്ര യാത്രയും പ്രമുഖരുമായി സംവാദവും: ക്യാമ്പിന്‍റെ ഭാഗമായി ശാസ്ത്ര പഠന യാത്ര സംഘടിപ്പിക്കും. പ്രകൃതി സൗഹൃദ ബാല്യം എന്ന നിലയിൽ ജൈവ സങ്കേതങ്ങളിലേക്കായിരിക്കും യാത്ര സംഘടിപ്പിക്കുക. ജല സാക്ഷരതയും ഈ യാത്രയിൽ വിദ്യാർഥികൾക്ക് നൽകും. ഇത് കൂടാതെ വിവിധ മേഖലകളിലെ പ്രമുഖരുമായി സംവദിക്കാനും ക്യാമ്പിൽ അവസരം ഒരുക്കിയിട്ടുണ്ട്. വിദ്യാഭ്യാസ മന്ത്രി വി ശിവൻകുട്ടി, ആരോഗ്യ മന്ത്രി വീണ ജോർജ്, പൊതുമരാമത്ത് മന്ത്രി മുഹമ്മദ് റിയാസ്, ശശി തരൂർ എം.പി, കവി മധുസൂദനൻ നായർ തുടങ്ങി നിരവധി പ്രമുഖർ ഈ സംവാദത്തിൽ പങ്കെടുക്കും.
പ്രവേശനം 300 കുട്ടികൾക്ക് ; ഫീസ് 1600 രൂപ: ക്യാമ്പില്‍ 300 കുട്ടികൾക്കാണ് പ്രവേശനം നിശ്ചയിച്ചിരിക്കുന്നത്. തിരുവനന്തപുരത്തെ ശിശുക്ഷേമ സമിതിയുടെ ഓഫിസിലാണ് കുട്ടികളുടെ പേരുകൾ രജിസ്റ്റർ ചെയ്യേണ്ടത്. ആദ്യം രജിസ്റ്റർ ചെയ്യുന്ന 300 കുട്ടികൾക്കാകും അവസരം നൽകുക.
വിവധ അനാഥാലയങ്ങളിലേയും ആദിവാസി മേഖലകളിലെ സ്‌കൂളുകളിലെയും കുട്ടികളെ സൗജന്യമായി ക്യാമ്പില്‍ പങ്കെടുപ്പിക്കും. ആദിവാസി മേഖലകളിൽ നിന്നെത്തുന്ന കുട്ടികൾക്ക് താമസ സൗകര്യവും സമിതി നൽകും. ഉച്ചഭക്ഷണം കുട്ടികൾ കൊണ്ടുവരണം. ലഘുഭക്ഷണം ക്യാമ്പില്‍ വിതരണം ചെയ്യും.
