തിരുവനന്തപുരം : കേരളത്തിലെ സര്‍വകലാശാലകളോട് അഫിലിയേറ്റ് ചെയ്‌തിട്ടുള്ള സര്‍ക്കാര്‍, എയ്‌ഡഡ് ആര്‍ട്‌സ് & സയന്‍സ് കോളജുകളിലും, ഐ.എച്ച്.ആര്‍.ഡി അപ്ലൈഡ് സയന്‍സ് കോളജുകളിലും ബിരുദ കോഴ്‌സുകളിലേക്കും 2022-23 അധ്യയനവര്‍ഷം ഒന്നാം വര്‍ഷ എയ്‌ഡഡ് പ്രോഗ്രാമുകളിലേക്കും പ്രവേശനം ലഭിച്ച വിദ്യാര്‍ഥികളിൽ നിന്നും കേരള സംസ്ഥാന ഉന്നത വിദ്യാഭ്യാസ സ്കോളര്‍ഷിപ്പ് അപേക്ഷകള്‍ ക്ഷണിക്കുന്നു. ഈ അധ്യായന വര്‍ഷം (2022-23) 1000 സ്കോളര്‍ഷിപ്പുകളാണ് അനുവദിക്കുന്നത്. അപേക്ഷകള്‍ മാര്‍ച്ച് 10 വരെ ഓണ്‍ലൈനായി സമര്‍പ്പിക്കാവുന്നതാണ്.
സയന്‍സ്, സോഷ്യൽ സയന്‍സ്, ഹ്യുമാനിറ്റീസ്, ബിസിനസ് സ്റ്റഡീസ് വിഷയങ്ങളില്‍ കേരളത്തിലെ ഗവണ്‍മെന്‍റ്, എയ്‌ഡഡ് ആര്‍ട്‌സ് & സയന്‍സ് കോളേജുകളില്‍ എയ്‌ഡഡ് കോഴ്‌സുകളില്‍ പഠിക്കുന്ന ഒന്നാം വര്‍ഷ ബിരുദ വിദ്യാര്‍ഥികള്‍ക്ക് സ്കോളര്‍ഷിപ്പിന് അപേക്ഷിക്കാം. സമാനമായ കോഴ്‌സുകള്‍ക്ക് ഐ.എച്ച്.ആര്‍.ഡി അപ്ലൈഡ് സയന്‍സ് കോളജുകളില്‍ പഠിക്കുന്ന ഒന്നാം വര്‍ഷ ബിരുദ വിദ്യാര്‍ഥികളും അപേക്ഷിക്കാന്‍ അര്‍ഹരാണ്. അപേക്ഷകര്‍ ഇന്ത്യന്‍ പൗരന്മാരായിരിക്കണം. പ്രൊഫഷണല്‍ കോഴ്‌സുകള്‍ക്കും, സെല്‍ഫ് ഫിനാന്‍സിങ് കോഴ്‌സുകൾ പഠിക്കുന്ന വിദ്യാര്‍ഥികള്‍ അപേക്ഷിക്കേണ്ടതില്ല.
