തിരുവനന്തപുരം : നെടുമങ്ങാട് പനവൂരില്‍ വായ്പ തിരിച്ചടവ് മുടങ്ങിയതിന്റെ പേരില്‍ വീട് ജപ്തി ചെയ്ത നടപടി എസ്.ബി.ഐ പിന്‍വലിച്ചു. ബാങ്കിന്റെ നടപടിക്കെതിരെ പ്രതിഷേധം ശക്തമായതോടെയാണ് എസ്.ബി.ഐ തീരുമാനം മാറ്റിയത്. വീടിന്റെ താക്കോലും രേഖകളും കുടുംബത്തിന് തിരിച്ചു നല്‍കി. സന്നദ്ധ സംഘടനകളും വ്യക്തികളും ചേര്‍ന്ന് രണ്ടു ലക്ഷം രൂപ ബാങ്കില്‍ അടച്ചതോടെയാണ് താക്കോല്‍ തിരികെ നല്‍കിയത്.
ഇന്നലെ ഉച്ചയോടെയാണ് പനവൂര്‍ സ്വദേശി ബാലുവിന്റെ വീട് എസ്.ബി.ഐ ബാങ്ക് വെഞ്ഞാറമൂട് ശാഖ അധികൃതര്‍ ജപ്തി ചെയ്‌തത്. വീട്ടില്‍ ആരുമില്ലാതിരുന്ന സമയത്തായിരുന്നു ബാങ്കിന്റെ ക്രൂരത. വീട് പൂട്ടി സീല്‍ ചെയ്തതോടെ ബാലുവിന്റെ പതിനൊന്ന് വയസ്സുകാരി മകള്‍ ഉള്‍പ്പടെയുള്ള കുടുംബം വസ്ത്രമോ ഭക്ഷണമോ ഇല്ലാതെ രാത്രി മുഴുവന്‍ വീടിന് പുറത്ത് കഴിയേണ്ടി വന്നു. കുടുംബത്തിന്റെ ദയനീയ അവസ്ഥ മാധ്യമങ്ങളിലൂടെ പുറംലോകമറിഞ്ഞതോടെ ബാങ്കിനെതിരെ പ്രതിഷേധം ശക്തമായി. എന്നാല്‍ പണം തിരിച്ചടയ്ക്കാതെ ജപ്തി പിന്‍വലിക്കില്ലെന്ന നിലപാടില്‍ ബാങ്ക് ഉറച്ചു നിന്നു. സര്‍ക്കാരും മറ്റും വിഷയത്തില്‍ ഇടപെട്ടതോടെ കുടിശികയായ 2,94000 രൂപയില്‍ 94000 രൂപ ഇളവ് ചെയ്യാന്‍ ബാങ്ക് സമ്മതിച്ചു. പണം അടയ്ക്കാന്‍ വ്യക്തികളും സന്നദ്ധ സംഘടനയും രംഗത്ത് വന്നതോടെ മണിക്കൂറുകള്‍ നീണ്ട അനിശ്ചിതത്വത്തിന് അവസാനമായി.
വീട് വെക്കുന്നതിനാണ് ബാലു എസ്.ബി.ഐ വെഞ്ഞാറമൂട് ശാഖയില്‍ നിന്ന് രണ്ടര ലക്ഷം രൂപ വായ്പയെടുത്തത്. 93000 രൂപ തിരിച്ചടയ്ക്കുകയും ചെയ്തു. എന്നാല്‍ കൂലിപ്പണിക്കാരനായ ബാലുവിന് ഒരപകടത്തില്‍ പരിക്കേറ്റതോടെയാണ് തിരിച്ചടവ് മുടങ്ങിയത്. ഇതോടെയാണ് ബാങ്ക് ജപ്തി നടപടികളുമായി മുന്നോട്ട് പോയത്.
