തിരുവനന്തപുരം: ഏകാധിപത്യ സ്വഭാവമുള്ള ഇടതുസര്‍ക്കാരില്‍ നിന്ന് കേരളത്തെ മോചിപ്പിച്ച് സംശുദ്ധമായ സദ്ഭരണം കെട്ടിപ്പടുക്കാന്‍ യുഡിഎഫിനെ സഹായിക്കണമെന്ന് പ്രതിപക്ഷ നേതാവ് രമേശ് ചെന്നിത്തല. കേരളചരിത്രത്തിലെ നിര്‍ണായകമായ വിധിയെഴുത്താണ് ഇത്തവണ നടക്കുന്നത്. വീണ്ടും ഒരിക്കല്‍ക്കൂടി ഇടതുമുന്നണി അധികാരത്തില്‍ വന്നാല്‍ കേരളത്തിന്‍റെ സര്‍വ നാശത്തിന് വഴിവെയ്ക്കും. അതിനാല്‍ ഓരോ കേരളീയനും വിവേക പൂര്‍ണമായി സമ്മതിദാനാവകാശം വിനിയോഗിക്കണമെന്ന് പ്രതിപക്ഷ നേതാവ് ആവശ്യപ്പെട്ടു.
സംസ്ഥാനത്തെ വോട്ടര്‍ പട്ടികയില്‍ ഓരോ മണ്ഡലങ്ങളിലും ആയിരക്കണക്കിന് വ്യാജ വോട്ടര്‍മാരെ തിരുകിക്കയറ്റി ജനഹിതത്തെ അട്ടിമറിക്കുന്നതിനുള്ള ആസൂത്രിത ശ്രമം നടന്നു. കള്ള വോട്ട് ചെയ്യുന്നത് തങ്ങളുടെ അവകാശമെന്ന മട്ടിലാണ് ചില സിപിഎം നേതാക്കള്‍ കഴിഞ്ഞ ദിവസം സംസാരിച്ചത്. ഇത് ജനാധിപത്യത്തിന് നേരെ ഉയരുന്ന വലിയ വെല്ലുവിളിയാണ്. ഒരു വോട്ടര്‍ ഒരു വോട്ട് മാത്രമേ ചെയ്യുന്നുള്ളൂ എന്ന് ഉറപ്പാക്കണമെന്ന് ഹൈക്കോടതി തെരഞ്ഞെടുപ്പ് കമ്മീഷന് നിര്‍ദ്ദേശം നല്‍കിയിട്ടുണ്ട്. അത് നടപ്പാക്കുമെന്ന് തെരഞ്ഞെടുപ്പ് കമ്മീഷന് ഉറപ്പും നല്‍കിയിട്ടുണ്ട്. ഞങ്ങള്‍ക്ക് തെരഞ്ഞെടുപ്പ് കമ്മീഷനില്‍ വിശ്വാസമുണ്ട്. എങ്കിലും ജനാധിപത്യം അട്ടിമറിക്കപ്പെടാതിരിക്കുന്നതിന് ഓരോ വോട്ടറും ജാഗരൂകമായിരിക്കേണ്ട തെരഞ്ഞെടുപ്പാണിതെന്ന് പ്രത്യേകം ഓര്‍മ്മിപ്പിക്കുന്നുവെന്നും രമേശ് ചെന്നിത്തല പറഞ്ഞു.
കഴിഞ്ഞ അഞ്ച് വര്‍ഷവും കേരളത്തെ അഴിമതിയില്‍ മുക്കുകയും സംസ്ഥാനത്തിന്‍റെ സമസ്ത മേഖലകളെയും തകര്‍ക്കുകയും ആചാരങ്ങളെയും വിശ്വാസങ്ങളെയും ചവിട്ടി മെതിച്ച് വിശ്വാസികളുടെ മനസില്‍ ഉണങ്ങാത്ത മുറിവ് സൃഷ്ടിക്കുകയും കേരളത്തെ കടക്കെണിയിലാക്കുകയും ചെയ്ത ഭരണമാണ് നിലനിന്നിരുന്നത്. നിയമങ്ങളും ചട്ടങ്ങളും മാത്രമല്ല, ഭരണ ഘടനാതത്വങ്ങളെപ്പോലും കാറ്റില്‍പ്പറത്തി കോടികളുടെ അഴിമതിയാണ് ഈ സര്‍ക്കാര്‍ നടത്തിയത്. സര്‍ക്കാരിന്‍റെ തണലില്‍ സ്വര്‍ണക്കടത്തും ഡോളര്‍ കടത്തും പോലുള്ള രാജ്യദ്രോഹക്കുറ്റങ്ങള്‍ വരെ അരങ്ങേറി.
കേരളത്തിന്‍റെ ചരിത്രത്തില്‍ മുന്‍പ് ഉണ്ടാകാത്ത ഏകാധിപത്യ സ്വാഭാവമുള്ള സര്‍ക്കാരാണ് നിലനിലനില്‍ക്കുന്നത്. പാര്‍ട്ടിയിലെയും സര്‍ക്കാരിലെയും അധികാരങ്ങള്‍ മുഴുവന്‍ ഒരു വ്യക്തിയിലേക്ക് ചുരുങ്ങുന്നത് അപകടകരമാണ്. ഇടതുഭരണത്തില്‍ പുറത്തുവന്ന എല്ലാ അഴിമതികളുടെയും വേരുകള്‍ ചെന്നെത്തുന്നത് മുഖ്യമന്ത്രിയിലാണ് എന്നത് ജനാധിപത്യത്തിന് നേരെ ഉയരുന്ന ഈ അപകടത്തിന്‍റെ ഗൗരവം വര്‍ധിപ്പിക്കുന്നു. ധാര്‍ഷ്ട്യവും ധിക്കാരവും അഹന്തയും അഴിമതിയുമാണ് സര്‍ക്കാരിന്‍റെ മുഖമുദ്ര. പൊതുഖജനാവില്‍ നിന്ന് കോടികള്‍ ഒഴുക്കി വ്യാജപ്രതിച്ഛായ സൃഷ്ടിച്ച് ജനങ്ങളെ തെറ്റിദ്ധരിപ്പിക്കാനാവുമോ എന്നാണ് ഇപ്പോള്‍ ഭരണക്കാര്‍ നോക്കുന്നതെന്നും ചെന്നിത്തല ആരോപിച്ചു.
