തിരുവനന്തപുരം: ബാലരാമപുരത്ത് വിവാഹ സത്‌കാരത്തിനിടെ ഉണ്ടായ കൂട്ടത്തല്ലിൽ പൊലീസ് കേസെടുത്തു. അഭിജിത്ത്, സന്ദീപ്, രാഹുൽ, വിവേക്, കുട്ടൂസൻ എന്നിവരുൾപ്പെടെ കണ്ടാലറിയാവുന്ന 15 പേർക്കെതിരെയാണ് ബാലരാമപുരം പൊലീസ് കേസെടുത്തത്. വധശ്രമം ഉൾപ്പെടെയുള്ള വകുപ്പുകൾ ചുമത്തിയാണ് പ്രതികൾക്കെതിരെ പൊലീസ് കേസ് രജിസ്റ്റർ ചെയ്‌തിരിക്കുന്നത്.
ശനിയാഴ്‌ച (12.11.2022) രാത്രി എട്ട് മണിയോടെ ബാലരാമപുരം സെന്‍റ് സെബാസ്റ്റ്യൻ ഓഡിറ്റോറിയത്തിലെ വിവാഹ സത്‌കാരത്തിനിടെ ആയിരുന്നു കൂട്ടത്തല്ലുണ്ടായത്. വധുവിന്‍റെ സഹോദരനും അയൽവാസിയായ അഭിജിത്തും തമ്മിലുണ്ടായിരുന്ന മുൻവൈരാഗ്യമാണ് സംഘർഷത്തിൽ കലാശിച്ചത്. കൂട്ടത്തല്ലിൽ വധുവിന്‍റെ പിതാവും വിഴിഞ്ഞം സ്വദേശിയുമായ അനിൽകുമാറിനടക്കം നിരവധി പേർക്ക് പരിക്കേറ്റു.
മാസങ്ങൾക്ക് മുമ്പ് വധുവിന്‍റെ സഹോദരനും അയൽവാസിയായ അഭിജിത്തും തമ്മിൽ വാക്കുതർക്കവും സംഘർഷവും നടന്നിരുന്നു. വിഴിഞ്ഞം പൊലീസ് സ്റ്റേഷനിൽ വച്ച് സംഭവം ഒത്തുതീർപ്പാക്കുകയും ചെയ്‌തിരുന്നു. ഈ സംഭവത്തിന്‍റെ പശ്ചാത്തലത്തിൽ വധുവിന്‍റെ വീട്ടുകാർ അഭിജിത്തിനെ വിവാഹത്തിന് ക്ഷണിച്ചിരുന്നില്ല.
എന്നാൽ ഇയാൾ വിവാഹ സത്‌കാരം നടക്കുന്ന ഹാളിലേക്കെത്തി വധുവിന്‍റെ പിതാവിന് 200 രൂപ ഉപഹാരമായി നൽകി. വധുവിന്‍റെ പിതാവ് ഇത് സ്വീകരിക്കാൻ തയാറായില്ല. തുടർന്ന് ഇയാൾ പുറത്തുപോയി സംഘം ചേർന്നെത്തി ഓഡിറ്റോറിയത്തില്‍ ഉണ്ടായിരുന്നവരെ മർദിക്കുകയായിരുന്നു.
തുടർന്ന് വിവാഹ സത്കാരത്തിനെത്തിയവരും പ്രതിരോധിച്ചതോടെ അടിപിടി കൂട്ടത്തല്ലില്‍ കലാശിച്ചു. കൂടുതൽ പൊലീസ് എത്തിയതോടെയാണ് സംഘർഷത്തിന് അയവ് വന്നത്. ഇന്നലെ പൊലീസ് സുരക്ഷയിലാണ് വിവാഹം നടന്നത്.
