തിരുവനന്തപുരം : അധ്യാപികയെ ലൈംഗിക ഉദ്ദേശത്തോടെ ഹോട്ടൽ റൂമിലേക്ക് ക്ഷണിച്ച് വിജിലൻസ് പിടിയിലായ ആർ. വിനോയ് ചന്ദ്രനെ പൊതുവിദ്യാഭ്യാസ വകുപ്പ് സസ്പെൻഡ്‌ ചെയ്‌തു. കാസർകോട് ജില്ല വിദ്യാഭ്യാസ ഓഫിസിൽ ജൂനിയർ സൂപ്രണ്ടായ ആർ. വിനോയ് ചന്ദ്രൻ ഗെയിൻ പിഎഫിന്‍റെ (GAINPF) സംസ്ഥാന നോഡൽ ഓഫിസർ ആണ്.
സർക്കാർ സേവനം ലഭ്യമാക്കാൻ ചുമതലപ്പെടുത്തിയ ഉദ്യോഗസ്ഥൻ തന്‍റെ ഔദ്യോഗിക പദവി ദുരുപയോഗം ചെയ്‌തതായും കടുത്ത അച്ചടക്ക ലംഘനവും ഗുരുതരമായ കൃത്യവിലോപവും കാട്ടിയതായും അന്വേഷണത്തിൽ ബോധ്യപ്പെട്ട സാഹചര്യത്തിലാണ് സസ്പെൻഷൻ.
വിനോയ് ചന്ദ്രനെതിരെ വകുപ്പുതല അച്ചടക്ക നടപടിയുമുണ്ടാകും. പി.എഫ് തുക പാസാക്കണമെങ്കില്‍ ലൈംഗിക ബന്ധത്തിൽ ഏര്‍പ്പെടണമെന്നാണ് അധ്യാപികയോട് വിനോയ് ചന്ദ്രന് ആവശ്യപ്പെട്ടത്. ഇതിനായി അധ്യാപികയെ ഹോട്ടലിലേക്ക് വിളിച്ചുവരുത്തിയപ്പോഴാണ് വിനോയ് ചന്ദ്രനെ കിഴക്കന്‍ മേഖല വിജിലന്‍സ് സൂപ്രണ്ട് വി.ജി വിനോദ് കുമാര്‍ അറസ്റ്റ് ചെയ്‌തത്.
