തിരുവനന്തപുരം : ബാലരാമപുരത്ത് ബൈക്കിലെത്തിയ രണ്ടംഗ സംഘം പത്തിലധികം വാഹനങ്ങൾ വെട്ടി തകർത്തു. രണ്ടുപേർക്ക് പരിക്ക്. പ്രതികളില്‍ ഒരാൾ പൊലീസ് കസ്‌റ്റഡിയിലായി.
ബാലരാമപുരം എരുത്താവൂർ, റസ്സൽപുരം തുടങ്ങിയ ഭാഗങ്ങളിലാണ് ബൈക്കിലെത്തിയ രണ്ടംഗ സംഘം അഴിഞ്ഞാടിയത്. ഇവർ സഞ്ചരിച്ച പ്രദേശത്തെ നിർത്തിയിട്ടിരുന്ന 9 ലോറി, 3 കാറ്, നാല് ബൈക്ക് എന്നിവ വെട്ടി തകർത്തു.
എരുത്താവൂർ സ്വദേശിയായ അനുവിന്‍റെ കടയുടെ മുമ്പിൽ നിർത്തിയിരുന്ന ഹോണ്ട ആക്‌ടീവ പൂർണമായും അടിച്ചുതകർത്തു. കാർ യാത്രക്കാരനായ ജയചന്ദ്രനും ബൈക്കിൽ സഞ്ചരിക്കുകയായിരുന്ന ഷീബ കുമാരിക്കുമാണ് വെട്ടേറ്റ് പരിക്ക് പറ്റിയത്. പരിക്കുകൾ സാരമുള്ളതല്ല.
ALSO READ: Ram Nath Kovind | രാഷ്ട്രപതി നാളെ കാസർകോട് ; അതീവ സുരക്ഷ, ഗതാഗത നിയന്ത്രണം
പരിഭ്രാന്തരായ നാട്ടുകാർ ബാലരാമപുരം പൊലീസിനെ വിവരമറിയിച്ചതിനെ തുടർന്ന് പൊലീസ് ഇവരെ പിന്തുടർന്നു. സഞ്ചരിച്ച ബൈക്ക് ഉപേക്ഷിച്ച് കടന്നുകളയാന്‍ ശ്രമിക്കുന്നതിനിടയിലാണ്‌ നരുവാമൂട് സ്വദേശി മിഥുനെ പൊലീസ് കസ്‌റ്റഡിയിലെടുത്തത്.
പിടിയിലായ മിഥുൻ ലഹരി ഉപയോഗിച്ചിരുന്നതായി പൊലീസ് പറയുന്നു. കൂട്ടുപ്രതിക്ക് വേണ്ടിയുള്ള അന്വേഷണം തുടരുന്നതായി ബാലരാമപുരം പൊലീസ് അറിയിച്ചു.
