തിരുവനന്തപുരം:ആരോഗ്യമേഖലയെ കരുതലോടെ പരിഗണിച്ച ബജറ്റാണ് ഇക്കുറി തോമസ് ഐസക്ക് അവതരിപ്പിച്ചിരിക്കുന്നത്. പ്രാഥമിക ആരോഗ്യ കേന്ദ്രങ്ങളുടെ വികസനത്തില്‍ ഊന്നിയ പദ്ധതികളാണ് ബജറ്റില്‍ അധികവും. സംസ്ഥാനത്തെ മുഴുവൻ ജനങ്ങളുടേയും ആരോഗ്യ നിലയെ കുറിച്ച് ഡാറ്റാ ബേസ് ഉണ്ടാക്കി, സ്ക്രീനിങ്ങിലൂടെ രോഗ നിര്‍ണയം നടത്തി , ചികിത്സ നല്‍കുക എന്ന പുതിയ തീരുമാനം ആരോഗ്യ മേഖലയ്ക്ക് കൂടുതല്‍ കരുത്തുപകരുന്നുമെന്ന കാര്യത്തില്‍ സംശയമില്ല. മാനസിക വെല്ലുവിളി നേരിടുന്നവർക്കടക്കം സാന്ത്വനപരിചരണം നടത്തുന്ന തദ്ദേശഭരണ സ്ഥാപനങ്ങൾക്ക് പ്രത്യേക സഹായം നൽകുന്നതിന് 10 കോടി രൂപ അധികമായി വകയിരുത്തിയിട്ടുണ്ട്.
സംസ്ഥാനത്തെ 80 ശതമാനം കാൻസര്‍ രോഗികള്‍ക്കും പൊതു ആരോഗ്യ മേഖലയില്‍ നിന്ന് തന്നെ കുറഞ്ഞ ചെലവില്‍ ചികിത്സ ലഭ്യമാക്കാനാണ് സര്‍ക്കാര്‍ ലക്ഷ്യമിടുന്നത്. ഇതിന് പുറമേ സാധാരണക്കാരായ രോഗികള്‍ക്ക് വേണ്ടി എല്ലാ ജില്ലാ ആശുപ്രതികളിലും കാർഡിയോളജി വകുപ്പും എല്ലാ താലൂക്ക് ആശുപ്രതികളിലും ട്രോമാമെകയറും ഡയാലിസിസ് യൂണിറ്റുകളും ആരംഭിച്ചു കൊണ്ടിരിക്കുകയാണെന്ന പ്രഖ്യാപനവും ഏറെ പ്രതീക്ഷയുള്ളവയാണ്. കേരളം മുഴുവൻ പന്തലിച്ചിട്ടുള്ള ജനകീയ ആരോഗ്യതലമായി സംസ്ഥാനത്തെ പാലിയേറ്റീവ് മേഖല മാറിയെന്നാണ് മന്ത്രിയുടെ വിലയിരുത്തല്‍.
കൊറോണയും നിപയും ആശങ്കയുണ്ടാക്കുന്ന സാഹചര്യത്തില്‍ രോഗ പ്രതിരോധ പ്രവര്‍ത്തനങ്ങളിലും അതിന് പുറമേ രോഗാതുരത നിരീക്ഷിക്കാനുമായി പാലിയേറ്റീവ് മേഖലയിലൂടെയുള്ള ജനകീയ ഇടപെടലാണ് ഈ ബജറ്റ് ലക്ഷ്യമിടുന്നത്. ആശാ പ്രവര്‍ത്തകര്‍ക്കും എക്‌സ്റ്റൻഷൻ പ്രവര്‍ത്തകര്‍ക്കുമായിരിക്കും ഇതിന്‍റെ ഏകോപന ചുമതല. ഇതിന് പുറമേ സാന്ത്വന ചികിത്സയ്ക്കും പ്രായമായവരുടെ സംരക്ഷണത്തിനും ആധുനിക സാങ്കേതികവിദ്യയുടെ സഹായം തേടാനും ബജറ്റില്‍ പദ്ധതിയുണ്ട്.
പദ്ധതി പ്രകാരം രോഗികൾ ഓട്ടോമാറ്റഡ് ക്യാമറയുടെ നിരീക്ഷണത്തിലായിരിക്കും. നിർമ്മിതബുദ്ധിയുടെ സഹായത്തോടെ അവരുടെ അസ്വഭാവിക ചലനങ്ങളും മറ്റും ഏറ്റവുമടുത്ത സാന്ത്വന കേന്ദ്രത്തിലോ ആരോഗ്യ പ്രവര്‍ത്തകനോ ലഭ്യമാകും എന്നതാണ് പദ്ധതിയുടെ പ്രത്യേകത. രക്തസമ്മർദ്ദം, നാഡിമിടിപ്പ്,ഓക്സിജൻ നില തുടങ്ങി അടിസ്ഥാന ആരോഗ്യ സൂചകങ്ങൾ ഓട്ടോമാറ്റിക്കായി ആരോഗ്യകേന്ദ്രത്തിൽ ലഭിക്കുന്നതിനുള്ള സംവിധാനവും ഇതിൽ ബന്ധിതമായിരിക്കും. ക്യാമറ മറ്റ് അനുബന്ധ സൗകര്യങ്ങൾ എന്നിവയ്ക്ക് എല്ലാം കൂടി ഒരു രോഗിക്ക് പതിനായിരം രൂപയാണ് ചെലവ് പ്രതീക്ഷിക്കുന്നത്. ഇതിന് വേണ്ടി പത്തുകോടി രൂപയാണ് അധികമായി വകയിരുത്തിയിരിക്കുന്നത്.
