തിരുവനന്തപുരം: തൊണ്ടിമുതൽ മോഷണക്കേസിൽ പ്രതികരണവുമായി മന്ത്രി ആന്‍റണി രാജു. മോഷണക്കേസിൽ നിയമം നിയമത്തിന്‍റെ വഴിക്കു പോട്ടെയെന്ന് മന്ത്രി പ്രതികരിച്ചു. ഓരോ ഘട്ടത്തിലും വേണ്ടതു ചെയ്യും. അതുകൊണ്ടാണ് എഫ്ഐആർ റദ്ദാക്കാൻ കോടതിയെ സമീപിച്ചതെന്നും മന്ത്രി പറഞ്ഞു.
തനിക്കെതിരായി നെടുമങ്ങാട് മജിസ്ട്രേട്ട് കോടതിയിലുള്ള കേസ് റദ്ദാക്കണമെന്നാവശ്യപ്പെട്ടാണ് ആൻ്റണി രാജു ഹർജി നൽകിയത്. 1990 ൽ അടിവസ്ത്രത്തിൽ ഒളിപ്പിച്ച മയക്കുമരുന്നുമായി തിരുവനന്തപുരം വിമാനത്താവളത്തിൽ നിന്ന് പിടിയിലായ പ്രതിയെ രക്ഷിക്കാൻ അഭിഭാഷകനായിരുന്ന ആൻ്റണി രാജു തൊണ്ടി മുതലിൽ കൃത്രിമം കാണിച്ചെന്നാണ് കേസ്.
