തിരുവനന്തപുരം: കോർപറേഷനിൽ ലോക്ക്‌ഡൗണ്‍ ഒരാഴ്‌ച കൂടി തുടരുമെങ്കിലും ഇളവുകൾ ഏർപ്പെടുത്തി സർക്കാരിന്‍റെ പുതിയ ഉത്തരവ് പുറത്തിറങ്ങി. നഗരസഭ പരിധിയിലെ പാൽ, പലചരക്ക് കടകൾ, ബേക്കറികൾ എന്നിവയ്ക്ക് രാവിലെ ഏഴ് മണി മുതൽ 12 മണി വരെയും വൈകിട്ട് നാല് മണി മുതൽ ആറ് മണി വരെയും തുറന്ന് പ്രവർത്തിക്കാം. ഇതിനിടയിലുള്ള സമയങ്ങളില്‍ സ്‌റ്റോക്ക് സ്വീകരിക്കാൻ മാത്രം കടകൾ തുറക്കാം. മെഡിക്കൽ സ്‌റ്റോറുകളും തുറക്കും. സാധനങ്ങളുടെ ഡോർ ഡെലിവറി അനുവദിക്കില്ല. അതേസമയം മരുന്ന്, ജനകീയ ഹോട്ടലിലെ ഭക്ഷണം എന്നിവ ഡോർ ഡെലിവറി നടത്താം.
കർശനമായ കൊവിഡ് മാനദണ്ഡങ്ങൾ പാലിച്ച് ഓട്ടോ ടാക്‌സി എന്നിവയ്ക്ക് സർവീസ് നടത്താം. രാത്രി ഒമ്പത് മണി മുതൽ പുലർച്ചെ അഞ്ച് മണി വരെ യാത്രാ നിരോധനം ഉണ്ടാകും. ബാങ്കുകൾക്ക് അമ്പത് ശതമാനം ജീവനക്കാരെ വച്ച് പ്രവർത്തിക്കാം. സെക്രട്ടേറിയറ്റിലെ ചീഫ് സെക്രട്ടറിയുടെ ഓഫിസ്, ആരോഗ്യം, ആഭ്യന്തരം, ദുരന്തനിവാരണം, തദ്ദേശ സ്വയംഭരണം, നോർക്ക എന്നി വകുപ്പുകൾ 50 ശതമാനം ജീവനക്കാരെ വച്ച് പ്രവർത്തിക്കും. മറ്റ് വകുപ്പുകളിൽ അത്യാവശ്യ ജോലികൾക്കായി 30 ജീവനക്കാരെ വച്ച് പ്രവർത്തിക്കാനും അനുമതി ഉണ്ട്. സർക്കാർ പ്രസുകളും പ്രവർത്തിക്കും.
എയർപോർട്ട്, റെയിൽവേ, പോസ്റ്റ് ഓഫിസുകൾ, ആവശ്യ സർവീസുകൾ എന്നിവയ്ക്കും അനുമതി ഉണ്ട്. വില്ലേജ്, താലൂക്ക് ഓഫിസുകൾ, ജല, വൈദ്യുതി വകുപ്പുകള്‍ എന്നിവയും പ്രവർത്തിക്കും. മറ്റ് സ്വകാര്യ-പൊതു ഓഫിസുകൾ വർക്ക് ഫ്രം ഹോം സംവിധാനം തുടരണം. ഹൈവേ, പാലം, റോഡ് തുടങ്ങിയ നിർമാണ പ്രവർത്തനങ്ങൾക്കും അനുമതിയുണ്ട്. ടെക്നോപാർക്കിലെ ഐ.ടി വിഭാഗത്തിന് അവശ്യ ജീവനക്കാരെ വച്ച് പ്രവർത്തിക്കാം.
അതേ സമയം ക്രിട്ടിക്കൽ കണ്ടെയ്ൻമെന്‍റ് സോണുകളായ പൂന്തുറ, പുത്തൻപള്ളി, മാണിക്യ വിളാകം, ബഫർ സോണുകളായ വലിയതുറ, മുട്ടത്തറ, വള്ളക്കടവ്, ബീമാപ്പളളി, ബീമാപ്പള്ളി ഈസ്റ്റ് എന്നിവയ്ക്ക് പുതിയ ഇളവുകൾ ബാധകമല്ല. ഇവിടെ കർശന നിയന്ത്രണങ്ങൾ തുടരും. എന്നാല്‍ ഇവിടങ്ങളില്‍ അവശ്യസാധനങ്ങൾ വിൽക്കുന്ന കടകൾ രാവിലെ ഏഴു മണി മുതൽ ഉച്ചയ്ക്ക് രണ്ടു മണി വരെ പ്രവർത്തിക്കും. വൈകിട്ട് ഏഴ് മണി മുതൽ രാവിലെ അഞ്ച് മണി വരെ ഈ പ്രദേശങ്ങളിൽ കർഫ്യൂവും ഏർപ്പെടുത്തി. അനാവശ്യമായി ആരും വീടുകൾ വിട്ട് പുറത്ത് ഇറങ്ങരുതെന്നും ജില്ലാ കലക്‌ടർ അറിയിച്ചു.
