തിരുവനന്തപുരം: ജലത്തിന്‍റെ ഗുണനിലവാരം പരിശോധിക്കുന്നതിനായി കേരള വാട്ടർ അതോറിറ്റിയുടെ (കെഡബ്ല്യുഎ) 82 ലാബുകൾ നാളെ (21.12.22) മുതൽ സംസ്ഥാനത്തുടനീളം പ്രവർത്തനമാരംഭിക്കും. നാഷണൽ അക്രഡിറ്റേഷൻ ബോർഡ് ഫോർ ടെസ്റ്റിംഗ് ആൻഡ് കാലിബ്രേഷൻ (എൻബിഎൽ) അംഗീകരിച്ച ലാബുകൾ കേന്ദ്രസർക്കാരിന്‍റെ സഹായത്തോടെയുള്ള 'ജൽ ജീവൻ മിഷന്‍റെ' ഭാഗമായാണ് സ്ഥാപിക്കുന്നത്.
ലാബുകൾക്കൊപ്പം, വാട്ടർ മീറ്റർ റീഡിംഗ് നടത്താൻ സഹായിക്കുന്ന സെൽഫ് മീറ്റർ റീഡിംഗ് ആപ്പും കെഡബ്ല്യുഎയുടെ ജീവനക്കാർക്കായി മാത്രമായി മറ്റൊരു മീറ്റർ റീഡിംഗ് ആപ്പും നാളെ തിരുവനന്തപുരം കെഡബ്ല്യുഎ ആസ്ഥാനത്ത് മുഖ്യമന്ത്രി പിണറായി വിജയൻ പുറത്തിറക്കും. ജില്ല-ഉപജില്ല തലങ്ങളിൽ സജ്ജീകരിച്ചിട്ടുള്ള ഈ ലാബുകളിൽ പൊതുജനങ്ങൾക്ക് വെള്ളം പരിശോധിക്കാവുന്നതാണ്. qpay.kwa.kerala.gov.in എന്ന വെബ്‌സൈറ്റിൽ ഓൺലൈനായി പണമടച്ചു വെള്ളത്തിന്‍റെ സാമ്പിൾ ലാബിൽ എത്തിക്കണം.
പരിശോധന ഫലം ഓൺലൈനായി ലഭ്യമാക്കും. കെഡബ്ല്യുഎയുടെ കീഴിൽ സംസ്ഥാനതല ലാബ് എറണാകുളത്തും 14 ജില്ല ലാബുകളും 32 ഉപജില്ല ലാബുകളുമായിരുന്നു ഉണ്ടായിരുന്നത്. എന്നാൽ, ജൽ ജീവൻ മിഷന്‍റെ സഹകരണത്തോടെ 38 പുതിയ ഉപജില്ല ലാബുകൾ കൂടി നിലവിൽ വന്നതോടെ മൊത്തം ലാബുകളുടെ എണ്ണം 85 ആയി.
ഇതിൽ 82 എണ്ണത്തിന് എന്‍ബിഎല്‍ അംഗീകാരം ലഭിച്ചു. കൂടാതെ, ടെസ്റ്റിംഗ് പാരാമീറ്ററുകൾ നിലവിലുള്ള 17 ൽ നിന്ന് 29 ആയി ഉയർത്തി. ഇതിലൂടെ ഗ്രാമീണ മേഖലയിലെ ജലാശയങ്ങളുടെ ഗുണനിലവാരവും ലാബുകൾ പരിശോധിക്കും.
തദ്ദേശ സ്വയംഭരണ സ്ഥാപനങ്ങൾക്ക് ഹോട്ടലുകൾക്കും വാണിജ്യ സ്ഥാപനങ്ങൾക്കും ലൈസൻസ് നൽകുന്നതിനും ഈ സേവനം ഉപയോഗിക്കാം. വിവിധ ലബോറട്ടറികളുടെ ഓഫീസ് സ്ഥലവും ഫോൺ നമ്പറും കെഡബ്ലൂഎ വെബ്‌സൈറ്റിൽ (www.kwa.kerala.gov.in ) ലഭ്യമാണ്. ഉപഭോക്താക്കൾക്ക് സഹായത്തിനായി ടോൾ ഫ്രീ നമ്പറായ 1916-ലും വിളിക്കാം.
