തിരുവനന്തപുരം: വിസി നിയമനത്തിൽ ഗവർണർ നിലപാട് കടുപ്പിച്ച സാഹചര്യത്തിൽ തുടർ നടപടി ചർച്ച ചെയ്യാൻ കേരള സർവകലാശാലയുടെ പ്രത്യേക സിൻഡിക്കേറ്റ് യോഗം ഇന്ന്(27.09.2022) ചേരും. വിസി നിയമനത്തിനുള്ള സെർച്ച് കമ്മിറ്റിയിലേക്ക് പ്രതിനിധിയെ നിർദേശിക്കണമെന്ന ഗവർണറുടെ അന്ത്യശാസനം സർവകലാശാല തള്ളിയിരുന്നു. ഇതിന്മേലുള്ള നടപടികൾ യോഗം പരിശോധിക്കും.
സർവകലാശാലയുടെ അഭിപ്രായം കണക്കാക്കാതെ ഗവർണർ ഏകപക്ഷീയമായി നടപടികളുമായി മുന്നോട്ട് പോവുകയാണ്. സെനറ്റ് പ്രതിനിധി വൈകിയതിനെ തുടർന്ന് യുജിസിയുടെയും ഗവർണറുടെയും പ്രതിനിധികളെ മാത്രം ഉൾക്കൊള്ളിച്ചാണ് ഗവർണർ ആരിഫ് മുഹമ്മദ് ഖാൻ സെർച്ച് കമ്മിറ്റി രൂപീകരിച്ചത്. ഒക്ടോബർ 24ന് വൈസ് ചാൻസലർ ആയ വിപി മഹാദേവൻ പിള്ളയുടെ കാലാവധി അവസാനിക്കുന്നതിനാൽ സെനറ്റ് പ്രതിനിധിയെ ഈ മാസം 26നു മുൻപ് നിർദേശിക്കണമെന്ന് ഗവർണർ കേരള വിസിയോട് നിർദേശിച്ചു.
എന്നാൽ സെർച്ച് കമ്മിറ്റിക്കെതിരെ പ്രമേയം പാസാക്കിയ പശ്ചാത്തലത്തിൽ വീണ്ടുമൊരു സെനറ്റ് യോഗം വിളിക്കുന്നതിൽ പ്രസക്തിയില്ലെന്നായിരുന്നു വിസിയുടെ മറുപടി. ഈ നിലപാടിലെ അതൃപ്‌തി സൂചിപ്പിച്ചു കൊണ്ടാണ് എത്രയും വേഗം പ്രതിനിധിയെ കണ്ടെത്തണമെന്ന് ഗവർണർ വീണ്ടും സർവകലാശാലക്ക് അന്ത്യശാസനം നൽകിയത്.
ഈ സാഹചര്യത്തിൽ കൂടിയാണ് പ്രത്യേക സിൻഡിക്കേറ്റ് യോഗം ഇന്ന് ചേരുന്നത്. ഗവർണറുടെ നിലപാടിന്മേൽ എന്ത് തുടർനടപടി സ്വീകരിക്കണമെന്ന് യോഗം ചർച്ച ചെയ്യും. നിയമോപദേശം തേടുന്നതിനെ കുറിച്ചും ആലോചിക്കും.
