തിരുവനന്തപുരം: ബിനീഷ് കോടിയേരിയുടെ വീട്ടിലെ എൻഫോഴ്‌സ്‌മെന്‍റ് ഡയറക്‌ടറേറ്റിന്‍റെ(ഇ.ഡി) റെയ്‌ഡിനു പിന്നാലെ കേരള പൊലീസും ഇ.ഡിയും തമ്മില്‍ കൊമ്പു കോര്‍ക്കുന്നു. ബിനീഷ് കോടിയേരിയുടെ ഭാര്യയെയും രണ്ടര വയസുള്ള മകളെയും ശാരീരികവും മാനസികവുമായി പീഡിപ്പിച്ചെന്ന ബന്ധുക്കളുടെ പരാതിയില്‍ ഇ.ഡി ഉദ്യോഗസ്ഥര്‍ക്ക് കേരള പൊലീസ് നോട്ടീസ് അയച്ചു.
ഇ-മെയില്‍ വഴിയാണ് നോട്ടീസ് നല്‍കിയത്. പൂജപ്പുര പൊലീസ് സ്റ്റേഷനില്‍ ഹാജരാകണമെന്നാവശ്യപ്പെട്ടാണ് ഇ.ഡി ഉദ്യോഗസ്ഥര്‍ക്ക് പൊലീസ് മെയിലയച്ചത്. രാവിലെ 11 മണിയോടെ റെയ്‌ഡ് പൂര്‍ത്തിയാക്കി പുറത്തിറങ്ങിയ ഇ.ഡി ഉദ്യോഗസ്ഥരെ കന്‍റോണ്‍മെന്‍റ് അസിസ്റ്റന്‍റ് കമ്മിഷണറുടെ നേതൃത്വത്തിലുള്ള സംഘം തടഞ്ഞ് വിശദീകരണം തേടിയിരുന്നു.
