തിരുവനന്തപുരം: ബിജെപി സംസ്ഥാന ഘടകത്തിന്‍റെ സോഷ്യല്‍ മീഡിയ ഇടപെടല്‍ തൃപ്‌തികരമല്ലെന്ന് വിമര്‍ശനം(Kerala Bjp Social Media Strategy). കേരളത്തിന്‍റെ സഹ പ്രഭാരിയും ദേശീയ ജനറൽ സെക്രട്ടറിയുമായ രാധാമോഹൻദാസ് അഗർവാളാണ് കാതലായ വിമര്‍ശനം എക്‌സിലൂടെ പ്രകടിപ്പിത്. അതുകൊണ്ട് തന്നെയാകണം കേരളത്തിൽ സാമൂഹിക മാധ്യമ പ്രചാരണത്തിൽ കാര്യമായ അഴിച്ചുപണി നടത്താന്‍ ബിജെപി ദേശീയ നേതൃത്വം തീരുമാനിച്ചത്.
സംസ്ഥാനത്തെ സോഷ്യല്‍ മീഡിയയുടെ ചുമതല കൂടുതൽ പ്രൊഫഷണലായ സംഘത്തെ ഏല്‍പ്പിക്കാനുള്ള സാധ്യതയാണ് തെളിഞ്ഞ് വരുന്നത്. സാമൂഹിക മാധ്യമങ്ങളിലെ പ്രചാരണത്തിൽ കേരളം ഏറെ പിന്നിലാണെന്ന് നേരത്തെ സംസ്ഥാനത്തിന്‍റെ ചുമതലയുള്ള ദേശീയ ജനറൽ സെക്രട്ടറി രാധാ മോഹൻദാസ് അഗർവാൾ പരസ്യമായി വിമർശിക്കുകയും ചെയ്‌തിരുന്നു.
'കേരളത്തിൽ വർഷത്തിൽ നൂറുകണക്കിന് യോഗങ്ങളിൽ പങ്കെടുക്കുന്ന ഞാന്‍ തമിഴ്‌നാട്ടില്‍ ഒരു തവണ പോയപ്പോള്‍ തമിഴ്‌നാട് ബിജെപിയുടെ പ്രവർത്തനങ്ങളിലും സമൂഹമാധ്യമ പ്രചാരണത്തിലും മാറ്റം കണ്ടെത്തിയിരുന്നു'. എന്നായിരുന്നു വിമര്‍ശനം. ഇത് വിവാദമായതോടെ അദ്ദേഹം വാക്കുകള്‍ പിന്‍വലിച്ചു. അതേ സമയം കേരളത്തിൽ സമൂഹമാധ്യമ പ്രചാരണത്തിന്‍റെ ചുമതലകളിൽ കാര്യമായ അഴിച്ചുപണിക്ക് ദേശീയ നേതൃത്വം ഒരുങ്ങുന്നുവെന്ന വിവരങ്ങൾ തന്നെയാണ് പുറത്ത് വരുന്നത്. കേരളത്തിൽ സംഘടന സമൂഹമാധ്യമ പ്രചാരണത്തിൽ കാര്യമായി പിന്നോട്ട് പോയെന്നാണ് വിലയിരുത്തൽ.
ദക്ഷിണേന്ത്യൻ സംസ്ഥാനങ്ങളിൽ എക്‌സില്‍ (ട്വിറ്ററിൽ) ഏറ്റവും കുറവ് ഫോളോവേഴ്‌സ് ബിജെപി കേരളം അക്കൗണ്ടിനാണ്. ഫേസ്ബുക്കിൽ തെലങ്കാനയുടെയും കേരളത്തിന്‍റെയും അക്കൗണ്ടുകൾ മാത്രമാണ് ഒരു മില്യണിൽ താഴെയുള്ളത്. പാർട്ടിക്കെതിരായ ആക്രമണങ്ങളെ ചെറുക്കുന്നതിലും സംസ്ഥാന ഘടകം പരാജയപ്പെട്ടുവെന്നാണ് വിലയിരുത്തല്‍.
ബിജെപിയുടെ ദേശീയ ഐടി സെല്ലിന്‍റെ ചുമതല കൂടിയുള്ള രാധാ മോഹൻദാസ് അഗർവാൾ ഇത് സംബന്ധിച്ച് ദേശീയ നേതൃത്ത്വത്തിന് നൽകിയ റിപ്പോർട്ട് കൂടി പരിഗണിച്ചാണ് നടപടിക്കൊരുങ്ങുന്നത്. കൂടുതൽ പ്രൊഫഷണലായ സംഘത്തെ ചുമതലയേൽപിക്കാനും, ടാർഗറ്റ് അടിസ്ഥാനത്തിൽ പ്രവർത്തിക്കാനും നേതൃത്വം നിർദേശിച്ചേക്കും.
അതേസമയം അഗർവാളിന്‍റെ പരസ്യ പ്രസ്‌താവനയില്‍ കേരള ഘടകം കടുത്ത അമർഷത്തിലാണ്. ഡെല്‍ഹിലെത്തിയ കെ സുരേന്ദ്രൻ സംഘടന ചുമതലയുള്ള ജന സെക്രട്ടറി ബി.എൽ. സന്തോഷിനെ നേരിട്ട് അതൃപ്‌തി അറിയിച്ചെന്നും സൂചനയുണ്ട്.
