തിരുവനന്തപുരം: സംസ്ഥാനത്ത് പ്രവാസികൾക്ക് നീതി ലഭിക്കുന്നില്ലെന്ന് കെപിസിസി അധ്യക്ഷൻ കെ സുധാകരൻ. കെപിസിസി ആസ്ഥാനത്ത് നടന്ന പ്രവാസി ഭാരത് ദിവസ് ഉദ്ഘാടനം ചെയ്‌ത് സംസാരിക്കുകയായിരുന്നു അദ്ദേഹം. കൊവിഡിനെ തുടർന്ന് മടങ്ങിവന്ന പ്രവാസികളെ സംരക്ഷിക്കാൻ കേന്ദ്രസർക്കാരും സംസ്ഥാന സർക്കാരും ഒരു നടപടിയും സ്വീകരിച്ചില്ല. പ്രവാസികൾക്ക് നൽകിയ ഒരു വാഗ്‌ദാനങ്ങളും പിണറായി സർക്കാർ നടപ്പാക്കിയില്ലെന്നും അദ്ദേഹം പറഞ്ഞു.
വിമാന ടിക്കറ്റുകളിൽ കൊള്ളയാണ് നടക്കുന്നത്. വിമാന കമ്പനികൾ ആവശ്യത്തിനനുസരിച്ച് ടിക്കറ്റ് വില വർധിപ്പിക്കുന്നത് നീചമാണ്. സർക്കാർ അത് തിരുത്തണം. പ്രവാസിയായ കണ്ണൂർ ആന്തൂർ സ്വദേശി സാജനെ ആത്മഹത്യയിലേക്ക് തള്ളിവിട്ട ആന്തൂർ നഗരസഭ, ഇപി ജയരാജന് റിസോർട്ട് പണിയാൻ അനുമതി നൽകി. സിപിഎമ്മിനും കൂട്ടാളികൾക്കും എന്തുമാകാം.
2019 ജൂൺ 18ന് കണ്ണൂർ കൊറ്റാളിയിലെ സാജൻ പാറയിൽ, തന്‍റെ ഉടമസ്ഥതയിലുള്ള ബക്കളം പാർഥാസ് കൺവെൻഷൻ സെന്‍ററിന് ആന്തൂർ നഗരസഭ അനുമതി നിഷേധിച്ചതിനെ തുടർന്നാണ് ആത്മഹത്യ ചെയ്‌തത്. സർക്കാർ പ്രവാസികൾക്ക് നിരവധി വാഗ്‌ദാനങ്ങൾ നൽകിയിട്ട് ഇപ്പോൾ എന്തായെന്നും സുധാകരൻ ചോദിച്ചു. നാടിന് വികസനമുണ്ടായെങ്കിൽ അതിന് പ്രവാസികളോടാണ് കടപ്പെട്ടിരിക്കുന്നതെന്നും സുധാകരൻ വ്യക്തമാക്കി.
