തിരുവനന്തപുരം: സർവകലാശാലകളിലെ വൈസ് ചാൻസലർമാരെ നിയമിക്കാനുള്ള ഗവർണറുടെ അധികാരം വെട്ടിക്കുറക്കുന്നതിനുള്ള ബില്ലിന് മന്ത്രിസഭ അംഗീകാരം നൽകിയ സാഹചര്യത്തിൽ കണ്ണൂർ സർവകലാശാലയ്‌ക്കെതിരെ ഗുരുതര ആരോപണങ്ങളുമായി ഗവർണർ ആരിഫ് മുഹമ്മദ് ഖാൻ. കണ്ണൂർ സർവകലാശാലയിൽ ഗുരുതരമായ ക്രമക്കേടുകളാണ് നടക്കുന്നതെന്നും സംസ്ഥാനത്തെ ഉന്നത വിദ്യാഭ്യാസ മേഖലയെ കുറിച്ച് തനിക്ക് ആശങ്കയുണ്ടെന്നും ഗവർണർ മാധ്യമങ്ങളോട് പറഞ്ഞു. തനിക്ക് അധികാരമുള്ളിടത്തോളം കാലം നിയമലംഘനം നടത്താൻ അനുവദിക്കില്ലെന്നും ഗവർണർ വ്യക്തമാക്കി.
പ്രഥമദൃഷ്‌ട്യാ വളരെ ഗുരുതരമായ ക്രമക്കേടുകളും സ്വജനപക്ഷപാതവുമാണ് സർവകലാശാലയിൽ നടക്കുന്നത്. നിയമലംഘനം, മാനദണ്ഡങ്ങൾ ലംഘനം, മര്യാദ ലംഘനം എന്നിവ സർവകലാശാലയുടെ നിയമമാണെന്ന് തോന്നുന്നുവെന്നും ഗവർണർ ആരിഫ് മുഹമ്മദ് ഖാൻ.
തന്നെ മാത്രം ഇരുട്ടിൽ നിർത്തുന്നു. ചിലത് ഒളിപ്പിക്കാൻ ഉണ്ടെന്നാണ് ഇതിൽ നിന്ന് മനസിലാക്കുന്നത്. ബില്ലിന് അംഗീകാരം നൽകുമ്പോൾ സർക്കാർ എന്തുചെയ്‌താലും അവരുമായി ഒരു പ്രശ്‌നത്തിനും താൻ പോകില്ല. എന്നാൽ അധികാരമുള്ളിടത്തോളം കാലം നിയമമോ മാനദണ്ഡങ്ങളോ ലംഘിക്കാൻ അനുവദിക്കില്ലെന്നും ഗവർണർ പറഞ്ഞു. താൻ ഒപ്പിട്ടാൽ മാത്രമേ നിയമമാകൂ എന്നും ഗവർണർ മുന്നറിയിപ്പ് നൽകി.
സർക്കാരിന്‍റെ നിരവധി ഓർഡിനൻസുകൾ ഗവർണറുടെ അംഗീകാരം ലഭിക്കാതെ മുടങ്ങിയ സാഹചര്യത്തിലാണ് ചാൻസലറുടെ അധികാരം കുറക്കുന്നതിനുള്ള ബില്ലിന് മന്ത്രിസഭ അംഗീകാരം നൽകിയത്. ലോകായുക്ത ഭേദഗതി ഓർഡിനനൻസ് ആണ് ഓഗസ്റ്റ് എട്ടിന് അവസാനിച്ച പ്രധാനപ്പെട്ട ഓർഡിനൻസുകളിൽ ഒന്ന്.
