കിടങ്ങിൽ വീണ് അപകടം, തിരുവനന്തപുരം മൃഗശാലയിലെ കൃഷ്‌ണ മൃഗത്തിന്‍റെ മുൻകാൽ മുറിച്ചു നീക്കി

Front leg of Blackbuck amputated: കൂടിനു മുന്നിലെ സുരക്ഷ കിടങ്ങിൽ വീണ കൃഷ്‌ണ മൃഗത്തിന്‍റെ ഇടത് മുൻകാലിന് ഗുരുതരമായ മൾട്ടിപ്പിൾ ഫ്രാക്‌ചര്‍ സംഭവിച്ച്‌, മുൻകാൽ ഒടിഞ്ഞ ആൺ കൃഷ്‌ണ മൃഗത്തിന്‍റെ കാലാണ് അടിയന്തര ശസ്ത്രക്രിയയിലൂടെ മുറിച്ചു നീക്കിയത്.

തിരുവനന്തപുരം : മൃഗശാലയിൽ കിടങ്ങിൽ വീണ് അപകടത്തിൽപ്പെട്ട കൃഷ്‌ണ മൃഗത്തിന്‍റെ മുൻകാൽ മുറിച്ചു നീക്കി (Front leg of Blackbuck amputated). മുൻകാൽ ഒടിഞ്ഞ ആൺ കൃഷ്‌ണ മൃഗത്തിന്‍റെ (Krishna Mrigam) കാലാണ് അടിയന്തര ശസ്ത്രക്രിയയിലൂടെ മുറിച്ചു നീക്കിയത്. രണ്ടാഴ്‌ചകൾക്ക് മുൻപാണ് കൂടിനു മുന്നിലെ സുരക്ഷ കിടങ്ങിൽ വീണ് കൃഷ്‌ണ മൃഗത്തിന്‍റെ ഇടത് മുൻകാലിന് ഗുരുതരമായ മൾട്ടിപ്പിൾ ഫ്രാക്‌ചര്‍ സംഭവിച്ചത്.

ഇതേ തുടർന്ന് ഫൈബർഗ്ലാസ്‌ കാസ്റ്റ് ചികിത്സ നൽകുകയും ചെയ്‌തിരുന്നു (Thiruvananthapuram zoo). പ്ലാസ്റ്റർ ഓഫ് പാരീസ് എന്ന എളുപ്പത്തിൽ കട്ടപിടിക്കുന്ന വസ്‌തു ഉപയോഗിച്ച് നൽകിയിരുന്ന ചികിത്സയ്ക്ക് പകരം ആധുനിക ഓർത്തോപീഡിക് ചികിത്സയിൽ ഇതിനുപകരമായി ഉപയോഗിക്കുന്ന താരതമ്യേന കൂടുതൽ കടുപ്പമുള്ള വസ്‌തുവാണ് ഫൈബർ ഗ്ലാസ് കാസ്റ്റ്. എന്നാൽ ഫൈബർഗ്ലാസ്‌ കാസ്റ്റ് ചികിത്സ നൽകിയെങ്കിലും ഇത് ദിവസങ്ങൾക്കുള്ളിൽ ഇളകിപ്പോയതിനെ തുടർന്നാണ് അടിയന്തര ശസ്ത്രക്രിയ നടത്തി അപകടത്തിൽ തകർന്ന മുൻകാൽ മുറിച്ചുമാറ്റിയത്.

കാസ്റ്റ് നൽകിയ ശേഷം ആവശ്യമായ വിശ്രമം നൽകുന്നത് കൃഷ്‌ണ മൃഗത്തെ പോലെ വളരെ വേഗത്തിൽ ഓടുന്ന മൃഗങ്ങളുടെ കാര്യത്തിൽ വളരെ ബുദ്ധിമുട്ടാണെന്ന് മൃഗശാല വെറ്ററിനറി സർജൻ ഡോ നികേഷ് കിരൺ പറഞ്ഞു. തിരുവനന്തപുരം കുടപ്പനക്കുന്ന് മൾട്ടി സ്പെഷ്യാലിറ്റി ആശുപത്രിയിൽ സർജൻ ഡോ. അനൂപ്, മൃഗശാല വെറ്ററിനറി സർജൻ ഡോ നികേഷ് കിരൺ എന്നിവരുടെ നേതൃത്വത്തിൽ ഒരുമണിക്കൂർ നീണ്ട ശസ്ത്രക്രിയയിലൂടെയാണ് കാൽ മുറിച്ച് നീക്കിയത്.

ഒരു കാൽ നഷ്‌ടമായാലും ശേഷിക്കുന്ന മൂന്ന് കാലുകളിൽ ബാലൻസ് ചെയ്‌ത്‌ നടക്കാനും ഓടാനുമൊക്കെ മൃഗത്തിനു സാധിക്കുമെന്ന് ഡോ. നികേഷ് കിരൺ പറഞ്ഞു. കൃഷ്‌ണ മൃഗം നിലവിൽ ആരോഗ്യവാനാണ്. കീപ്പർ ബിജു, സൂപ്പർവൈസർ സജി, ലൈവ് സ്റ്റോക്ക് ഇൻസ്‌പെക്‌ടർ സുധിൻ, ക്യൂറേറ്റർ സംഗീത എന്നിവരും പ്രവർത്തിയിൽ പങ്കാളികളായി.

ബംഗാൾ കുരങ്ങിന്‍റെ ശാസ്‌ത്രക്രിയ വിജയകരം: തിരുവനന്തപുരം മൃഗശാലയില്‍ നവംബര്‍ 17 ന്‌ നടന്ന ബംഗാൾ കുരങ്ങിന്‍റെ ശസ്‌ത്രക്രിയ വിജയകരനായിരുന്നു. കുരങ്ങിന് ഗ്യാസ് അനസ്‌തേഷ്യ നൽകി മയക്കിയായിരുന്നു ശസ്‌ത്രക്രിയ. സംസ്ഥാനത്ത് ആദ്യമായാണ് ഇത്തരത്തിൽ ശസ്‌ത്രക്രിയ നടത്തുന്നത്. മൃഗശാലയിൽ തന്നെ ജനിച്ചുവളർന്ന 22 വയസ് പ്രായമുള്ള മാളു എന്ന പെൺ ബംഗാൾ കുരങ്ങിനാണ് സ്‌തനാർബുധത്തെ തുടർന്ന്‌ ശസ്‌ത്രക്രിയ നടത്തിയത്. 64 ഗ്രാം ഭാരമുള്ള മുഴയാണ് സ്‌തനത്തിൽ നിന്ന് ശസ്‌ത്രക്രിയയിലൂടെ നീക്കം ചെയ്‌തത്.