തിരുവനന്തപുരം: വിഴിഞ്ഞം രാജ്യാന്തര തുറമുഖത്തേക്കുള്ള ആദ്യ കപ്പലായ ഷെന്‍ഹുവ 15 വിഴിഞ്ഞം പുറങ്കടലില്‍ എത്തി. വിഴിഞ്ഞം തുറമുഖത്തിന്‍റെ പടിഞ്ഞാറ് ഭാഗത്തായി 28 നോട്ടിക്കല്‍ മൈല്‍ ദൂരെയാണ് ഇപ്പോള്‍ കപ്പലിന്‍റെ സ്ഥാനം. ഈ മാസം 15-നാണ് കപ്പല്‍ വിഴിഞ്ഞം തുറമുഖത്തേക്ക് പ്രവേശിക്കുക (First Cargo Ship to Vizhinjam port).
ചൈനയിലെ ഷാങ്ഹായ് തുറമുഖത്ത് നിന്നും പുറപ്പെട്ട ഷെന്‍ഹുവ 15 ല്‍ (zhenhua 15 ship) വിഴിഞ്ഞം തുറമുഖത്തേക്കുള്ള ഒരു സൂപ്പര്‍ പോസ്റ്റ് പനാമാക്‌സ് ക്രെയിന്‍, രണ്ട് റെയില്‍ മൗണ്ടഡ് ഗാന്‍ട്രി ക്രെയിന്‍ എന്നിങ്ങനെ മൂന്ന് ക്രെയിനുകളാണ് ഉള്ളത്. ക്രെയിനുകള്‍ ഇറക്കുന്നതിനുള്ള റെയിലുകള്‍ ബര്‍ത്തില്‍ നിരത്തുന്ന ജോലിയും അന്തിമഘട്ടത്തിലാണ്.
കപ്പലിനെ ബര്‍ത്തിലേക്ക് അടുപ്പിക്കുന്നതിനായി നാല് ടഗ്ഗുകള്‍ (Dolphin 27 tug) വിഴിഞ്ഞം തുറമുഖത്ത് നേരത്തേ എത്തിയിട്ടുണ്ട്. ടഗ്ഗുകളുടെ സഹായത്തോടെ കപ്പലിനെ ബര്‍ത്തിന് 100 മീറ്ററോളം അരികിലെത്തിക്കും. ഞായറാഴ്‌ച (ഒക്‌ടോബർ 15) നടക്കുന്ന സ്വീകരണച്ചടങ്ങില്‍ ജലധാരയുടെ അകമ്പടിയോടെ കപ്പലിനെ ബര്‍ത്തിലേക്ക് എത്തിക്കും. നേരത്തെ ഒക്ടോബര്‍ നാലിനാണ് കപ്പല്‍ എത്തുമെന്ന് അറിയിച്ചിരുന്നതെങ്കിലും ഷാങ്ഹായ്, വിയറ്റ്‌നാം, സിംഗപ്പൂര്‍ എന്നിവിടങ്ങളിലെ ടൈക്കൂണ്‍ കാരണം യാത്രയുടെ വേഗത കുറയുകയും കപ്പല്‍ എത്തുന്ന തീയതി മാറുകയുമായിരുന്നു.
ഞായറാഴ്‌ച നടക്കുന്ന ഉദ്ഘാടന ചടങ്ങില്‍ കേന്ദ്ര ഷിപ്പിങ് മന്ത്രി സര്‍ബാനന്ദ സോനോവാള്‍ മുഖ്യാതിഥിയാവും. മുഖ്യമന്ത്രി പിണറായി വിജയന്‍ ചടങ്ങ് ഉദ്ഘാടനം ചെയ്യും. അദാനി വിഴിഞ്ഞം പോര്‍ട്ട് ലിമിറ്റഡ് ചെയര്‍മാന്‍ കരണ്‍ അദാനിയും പരിപാടിയില്‍ പങ്കെടുക്കും.
7600 കോടി രൂപയുടെ പൊതു-സ്വകാര്യ പങ്കാളിത്ത പദ്ധതിയായ വിഴിഞ്ഞം തുറമുഖം (vizhinjam International SeaPort) ഇന്ത്യയിലെ ഏറ്റവും വലിയ ആഴക്കടല്‍ തുറമുഖമാണ് (20 മീറ്റര്‍ ആഴം). പ്രതിവര്‍ഷം 10 ലക്ഷം കണ്ടെയ്‌നര്‍ ട്രാന്‍ഷിപ്പ്‌മെന്‍റ്, 5000ത്തിലധികം തൊഴിലവസരങ്ങള്‍, കേന്ദ്ര സര്‍ക്കാരിന്‍റെ വയബിലിറ്റി ഗ്യാപ്പ് ഫണ്ട് ലഭിക്കുന്ന ആദ്യ ഗ്രീന്‍ഫീല്‍ഡ് തുറമുഖം, തുറമുഖത്തേക്ക് 11 കിലോമീറ്റര്‍ പ്രകൃതി സൗഹൃദ തുരങ്ക റെയില്‍പ്പാത, 6000 കോടി രൂപ മുതല്‍മുടക്കില്‍ ഔട്ടര്‍ റിങ് റോഡും വ്യാവസായിക ഇടനാഴിയും, തുറമുഖാധിഷ്‌ടിത തൊഴില്‍ പരിശീലനത്തിന് 50 കോടി രൂപ ചെലവില്‍ ട്രെയിനിങ് സെന്‍റര്‍, ലോജിസ്റ്റിക് പാര്‍ക്കും അനുബന്ധ വ്യവസായങ്ങളും എന്നിവ വിഴിഞ്ഞം അന്താരാഷ്ട്ര തുറമുഖത്തിന്‍റെ പ്രത്യേകതയാണ്.
ALSO READ : vizhinjam International SeaPort : വിഴിഞ്ഞം തുറമുഖം; ഡോള്‍ഫിന്‍ 27 ടഗ്ഗ്‌ എത്തി, ഡോള്‍ഫിന്‍ 37 ഇന്നെത്തും
