തിരുവനന്തപുരം: ഇലന്തൂരിൽ നടന്ന ആഭിചാരക്കൊല കേരളത്തിൽ നിലനിൽക്കുന്ന അന്ധവിശ്വാസങ്ങളുടെയും, അനാചാരങ്ങളുടെയും തീവ്രത തുറന്നുകാട്ടുന്നതാണെന്നും അതിനെതിരായി ശക്തമായ പോരാട്ടം ആവശ്യമാണെന്നും സിപിഎം സംസ്ഥാന സെക്രട്ടേറിയറ്റ്. കേരളം പോലുള്ള സംസ്ഥാനത്ത്‌ ഇത്തരമൊരു സ്ഥിതിവിശേഷം ഉണ്ടാകുമെന്ന്‌ ആരും ചിന്തിച്ചിട്ടില്ല. മനുഷ്യമനസാക്ഷിയെ ഞെട്ടിച്ച ഈ സംഭവത്തെ ശക്തമായി അപലപിക്കുന്നതായും പ്രസ്‌താവനയിൽ സിപിഎം വ്യക്തമാക്കി.
ഇതുമായി ബന്ധപ്പെട്ട എല്ലാ വശങ്ങളും നിയമത്തിന്‍റെ മുമ്പിൽ കൊണ്ടുവന്ന്‌ സമൂഹത്തിനൊരു പാഠമായി ഈ അന്വേഷണത്തെ മാറ്റണം. നിലവിലുള്ള നിയമങ്ങൾ കർശനമായി നടപ്പിലാക്കുന്നതിനോടൊപ്പം തന്നെ ആവശ്യമെങ്കിൽ പുതിയ നിയമനിർമാണമുൾപ്പെടെ ആലോചിക്കേണ്ടതാണെന്നും സിപിഎം പ്രസ്‌താവനയിൽ വ്യക്തമാക്കി.
