തിരുവനന്തപുരം: സംസ്ഥാന സർക്കാരിന്‍റെ സ്വപ്‌നപദ്ധതികളിലേയ്ക്കും അന്വേഷണം വ്യാപിപ്പിച്ച് എൻഫോഴ്സ്മെന്റ് ഡയറക്‌ടറേറ്റ്. സർക്കാർ പ്രഖ്യാപിച്ചിട്ടുള്ള നാലു പദ്ധതികളുടെ വിശദാംശങ്ങൾ ആവശ്യപ്പെട്ട് ചീഫ് സെക്രട്ടറിക്ക് എൻഫോഴ്സ്മെന്റ് ഉദ്യോഗസ്ഥർ കത്ത് നൽകി.
കെ ഫോൺ, സ്മാർട്ട് സിറ്റി, ഡൗൺടൗൺ , ഇ-മൊബിലിറ്റി തുടങ്ങിയ പദ്ധതികളുടെ വിശദാംശങ്ങൾ ആവശ്യപ്പെട്ടാണ് കത്ത് നൽകിയത്. എം ശിവശങ്കർ മുഖ്യമന്ത്രിയുടെ പ്രിൻസിപ്പൽ സെക്രട്ടറി ആയിരുന്ന സമയത്ത് മുൻകൈയെടുത്ത് നടപ്പിലാക്കിയതാണ് ഈ നാല് പദ്ധതികളും. പദ്ധതിക്കായി തയ്യാറാക്കിയ ധാരണാപത്രം, ഭൂമി ഏറ്റെടുത്തിട്ടുണ്ടെങ്കിൽ അതിന്‍റെ വിവരങ്ങളും വിലയും അടക്കം വിശദമായ വിവരങ്ങൾക്കൊപ്പം ഈ പദ്ധതികളിൽ പങ്കാളികളായിട്ടുള്ളവരുടെ വിവരങ്ങളും ആവശ്യപ്പെട്ടിട്ടുണ്ട്. ഇത്തരം പദ്ധതികളിൽ ശിവശങ്കറിനെ കൂടാതെ മറ്റ് ഐഎഎസ് ഉദ്യോഗസ്ഥർക്കും പങ്കുണ്ടോയെന്നും ഇഡി പരിശോധിക്കുന്നുണ്ട്
