തിരുവനന്തപുരം: സുനന്ദ പുഷ്‌കര്‍ കേസില്‍ ശശി തരൂരിനെതിര സി.പി.എമ്മും ബി.ജെ.പിയും നടത്തിയ വേട്ടയാടലിനും കള്ള പ്രചാരണത്തിനും അറുതി വരുത്തിയ കോടതി വിധി സ്വാഗതം ചെയ്യുന്നതായി കെ.പി.സി.സി പ്രസിഡന്‍റ് കെ. സുധാകരന്‍ എം.പി. ഏഴുവര്‍ഷം തരൂരിനെ തേജോവധം ചെയ്യാന്‍ ശ്രമിച്ചവര്‍ മാപ്പു പറയാനെങ്കിലും തയ്യാറാകണമെന്നും അദ്ദേഹം പറഞ്ഞു.
തരൂര്‍ ലോക്‌സഭയിലേക്കു മത്സരിച്ചപ്പോള്‍ ഈ വിഷയമുയര്‍ത്തിയാണ് സി.പി.എം അദ്ദേഹത്തെ തോല്‍പ്പിക്കാന്‍ ശ്രമിച്ചത്. ഇതേ പ്രചാരണം ബി.ജെ.പിയും അഴിച്ചു വിട്ടു. നെറികെട്ട എല്ലാ രാഷ്ട്രീയ ആരോപണങ്ങളും കോടതി ചവറ്റു കൊട്ടയില്‍ വലിച്ചെറിഞ്ഞിരിക്കയാണ്. സത്യത്തെ ഒരിക്കലും മറയ്ക്കാനാകില്ലെന്ന് തെളിയിക്കുന്നതു കൂടിയാണ് കോടതി വിധിയെന്ന് സുധാകരന്‍ പറഞ്ഞു.
ദു:സ്വപ്നത്തിന് പര്യവസാനമെന്ന് തരൂര്‍
അതേസമയം, കേസില്‍ കുറ്റവിമുക്തനായതില്‍ പ്രതികരണവുമായി ശശി തരൂർ എം.പി രംഗത്തെത്തി. കേസില്‍ നിന്നും തന്നെ മോചിപ്പിച്ച ജഡ്‌ജി ഗീതാജ്ഞലി ഗോയലിനും അഭിഭാഷകരായ വികാസ് പഹ്‌വ, ഗൗരവ് ഗുപ്‌ത എന്നിവരോടുമുള്ള നന്ദി തരൂര്‍ ട്വീറ്റിലൂടെ അറിയിച്ചു. അടിസ്ഥാനരഹിതമായ ആരോപണങ്ങളും മാധ്യമങ്ങളുടെ അധിക്ഷേപങ്ങളും തനിയ്‌ക്ക് നേരിടേണ്ടി വന്നതായും ദു:സ്വപ്നത്തിന് പര്യവസാനമായെന്നും തരൂര്‍ പറഞ്ഞു.
