തിരുവനന്തപുരം : കെ.വി തോമസിനുപിന്നാലെ മുതിര്‍ന്ന നേതാവായ പി.ജെ കുര്യനെതിരെയും കോണ്‍ഗ്രസില്‍ അതൃപ്‌തി. രാഹുല്‍ ഗാന്ധിയെ വിമര്‍ശിച്ച പി.ജെ കുര്യനെതിരെ ഉണ്ടായ പടയൊരുക്കമാണ് പാര്‍ട്ടിയിലെ പുതിയ പ്രശ്‌നം. ഇതിന്‍റെ പശ്ചാത്തലത്തില്‍, തിങ്കാളാഴ്‌ച ചേര്‍ന്ന കോണ്‍ഗ്രസ് രാഷ്ട്രീയകാര്യ സമിതിയില്‍ നിന്നും പി.ജെ കുര്യന്‍ വിട്ടുനിന്നു. രാഹുല്‍ ഗാന്ധിക്കെതിരായ വിമര്‍ശനത്തില്‍ കുര്യനെതിരെ നടപടി വേണമെന്ന് രാഷ്ട്രീയ കാര്യസമിതിയില്‍ ടി.എന്‍ പ്രതാപന്‍ ആവശ്യപ്പെട്ടു.
'രാഹുലിന് സ്ഥിരതയില്ല ': കേരളശബ്‌ദം വാരികയ്‌ക്ക് പി.ജെ കുര്യന്‍ നല്‍കിയ അഭിമുഖമാണ് പുതിയ വിമര്‍ശനങ്ങള്‍ക്ക് ആധാരം. രാഹുല്‍ ഗാന്ധിക്ക് സ്ഥിരതയില്ലെന്നും പാര്‍ട്ടിക്ക് പ്രതിസന്ധി വന്നപ്പോള്‍ മുന്നില്‍ നിന്ന് സധൈര്യം നയിക്കുകയായിരുന്നു ചെയ്യേണ്ടിയിരുന്നതെന്നായിരുന്നുമായിരുന്നു പി.ജെ കുര്യന്‍റെ പരാമര്‍ശം.
'കപ്പല്‍ ഉപേക്ഷിക്കരുത്, നയിക്കണം മുന്നില്‍നിന്ന്' : കപ്പിത്താന്‍, കപ്പല്‍ മുങ്ങാന്‍ പോകുമ്പോള്‍ ഉപേക്ഷിച്ചുപോകുന്നതിനുപകരം സീനിയേഴ്‌സിനെയൊക്കെ വിളിച്ച് ചര്‍ച്ച ചെയ്‌ത്, മുന്നില്‍ നിന്ന് നയിക്കുകയായിരുന്നു വേണ്ടത്. രാഹുല്‍ ചര്‍ച്ചചെയ്യുന്നത് അദ്ദേഹത്തിന് ചുറ്റുമുളള കോക്കസുമായാണ്. അതില്‍ തെരഞ്ഞെടുപ്പില്‍ മത്സരിച്ചുപോലും പരിചയമുളളവര്‍ കുറവാണ്. എല്ലാവരുമായും ചര്‍ച്ചചെയ്‌ത് പ്രശ്‌നം പരിഹരിക്കുന്നതിനുപകരം കപ്പലുപേക്ഷിച്ച് പുറത്തുചാടി ഓടുകയാണ് രാഹുല്‍ ചെയ്‌തത്.
കോണ്‍ഗ്രസ് പ്രസിഡന്‍റ് നെഹ്‌റു കുടുംബത്തില്‍ നിന്നുതന്നെ വേണമെന്നില്ല. യോഗ്യതയുളളവര്‍ വന്നോട്ടെ. പക്ഷേ, അവിടെ നിന്നുതന്നെ വേണമെന്നുപറയുന്നത് ശരിയല്ല. യോഗ്യതയുളളവര്‍ നെഹ്‌റു കുടുംബത്തില്‍ ഉണ്ടെങ്കില്‍ ആ സ്ഥാനത്തേക്ക് വരട്ടെ. ഇല്ലെങ്കില്‍ വഴിമാറിക്കൊടുക്കണം. കോണ്‍ഗ്രസ് പ്രസിഡന്‍റ് സ്ഥാനം ഇട്ടെറിഞ്ഞുപോയ ആള്‍ തന്നെയാണ് പാര്‍ട്ടിയില്‍ തീരുമാനങ്ങളെടുക്കുന്നത്, ഇത് ശരിയല്ല.
കെ.വി തോമസിന് പിന്നാലെ പി.ജെ കുര്യന്‍ : രാഹുല്‍ ഗാന്ധി സംഘടന തെരഞ്ഞെടുപ്പില്‍ മത്സരിച്ച് വീണ്ടും പ്രസിഡന്‍റാവുന്നതില്‍ പരാതിയില്ല. തെരഞ്ഞെടുക്കപ്പെട്ട പ്രസിഡന്‍റില്ലാതെ പാര്‍ട്ടി മുന്നോട്ടുപോവില്ല. കോണ്‍ഗ്രസ് പ്രതിസന്ധിയില്‍ നില്‍ക്കുമ്പോള്‍ തിരിച്ചറിവിലേക്ക് നയിക്കാനാണ് ജി 23 കൂട്ടായ്‌മയെന്നും പി.ജെ കുര്യന്‍ പറയുകയുണ്ടായി.
പാര്‍ട്ടി പ്രതിസന്ധിയില്‍ നില്‍ക്കുമ്പോള്‍ നേതാവിനെ പരസ്യമായി വിമര്‍ശിച്ചത് അനുചിതവും അച്ചടക്കത്തിന് നിരക്കാത്തതുമാണെന്നാണ് കുര്യനുനേരെയുളള വിമര്‍ശനം. സി.പി.എം പാര്‍ട്ടി കോണ്‍ഗ്രസില്‍ വിലക്കുലംഘിച്ച് പങ്കെടുത്തതിന് കെ.വി തോമസിനോട് വിശദീകരണം ചോദിച്ചതിന് പിന്നാലെ പി.ജെ കുര്യനുനേരെയും ഉയരുന്നത് അച്ചടക്കത്തിന്‍റെ വാള്‍ തന്നെയാണ്.
