തിരുവനന്തപുരം: കെ.എസ്.ആർ.ടി.സിയിൽ ജീവനക്കാർക്ക് എല്ലാ മാസവും ശമ്പളം നൽകാനുള്ള ബാധ്യത സർക്കാരിന് ഏറ്റെടുക്കാനാകില്ലെന്നാവർത്തിച്ച് ഗതാഗത മന്ത്രി ആൻ്റണി രാജു. പൊതുമേഖല സ്ഥാപനങ്ങൾക്ക് എല്ലാ കാലവും സഹായം ചെയ്യാൻ സർക്കാരിനാകില്ലെന്നും മന്ത്രി പറഞ്ഞു. ഇക്കാര്യത്തിൽ വളരെ വ്യക്തമായ നിലപാടാണ് സർക്കാരിൻ്റേതെന്ന് അദ്ദേഹം വ്യക്തമാക്കി.
കെ.എസ്.ആർ.ടി.സിക്ക് രണ്ടായിരം കോടി കഴിഞ്ഞ വർഷം നൽകിയിരുന്നു. പെൻഷൻ വിതരണത്തിനും വലിയ ഇടപെടൽ സർക്കാർ നടത്തി. യാഥാർഥ്യം ഉൾക്കൊള്ളാൻ തൊഴിലാളി യൂണിയനുകൾ തയ്യാറാകണം. യൂണിയനുകൾ സമരത്തിനിറങ്ങിയാൽ പ്രതിവിധി കാണേണ്ടത് മാനേജ്മെൻ്റാണെന്നും മന്ത്രി പറഞ്ഞു.
