പൊലീസുകാരന്‍റെ മരണം; വീണ്ടും ഭാര്യയുടെ മൊഴിയെടുത്തു

ആരോപണ വിധേയരായ പൊലീസുകാർക്കെതിരെ ആത്മഹത്യാ പ്രേരണാ കുറ്റം ചുമത്തി കേസെടുത്തതിന്‍റെ പശ്ചാത്തലത്തിലാണ് വീണ്ടും മൊഴി രേഖപ്പെടുത്തിയത്

പാലക്കാട്: കല്ലേക്കാട് എ ആർ ക്യാമ്പിലെ പൊലീസുകാരൻ കുമാറിന്‍റെ മരണത്തിൽ ക്രൈം ബ്രാഞ്ച് അന്വേഷണ സംഘം വീണ്ടും ഭാര്യ സജനിയുടെ മൊഴിയെടുത്തു. ആരോപണ വിധേയരായ പൊലീസുകാർക്കെതിരെ ആത്മഹത്യാ പ്രേരണാ കുറ്റം ചുമത്തി കേസെടുത്തതിന്‍റെ പശ്ചാത്തലത്തിലാണ് വീണ്ടും മൊഴി രേഖപ്പെടുത്തിയത്.

പട്ടികജാതി- പട്ടികവർഗ്ഗ പീഡന നിരോധന നിയമം, ആത്മഹത്യാ പ്രേരണക്കുറ്റം, മോഷണം, ഭവനഭേദനം എന്നീ വകുപ്പുകൾ ചുമത്തിയ കേസിന് കൂടുതൽ തെളിവുകൾ ആവശ്യമാണ്. കുമാറിന്‍റെ കുടുംബാംഗങ്ങളിൽ നിന്നും ക്യാമ്പിൽ നിന്നും ലഭിച്ച വിവരങ്ങളുടെ അടിസ്ഥാനത്തിലും ആത്മഹത്യാ പ്രേരണക്കുറ്റം ചുമത്താൻ ആവശ്യമായ തെളിവുകൾ ലഭിച്ചിട്ടുണ്ടെന്ന് ക്രൈംബ്രാഞ്ച് അധികൃതർ പറഞ്ഞു. കുമാറിന്‍റെ മൃതദേഹത്തിന് സമീപത്തു നിന്നു ലഭിച്ച മൊബൈൽ ഫോൺ, കത്ത്, ബാഗിലുണ്ടായിരുന്ന പൊലീസ് യൂണിഫോം, താക്കോൽ എന്നിവയും അന്വേഷണസംഘം വീണ്ടും പരിശോധിക്കും.