പാലക്കാട് : ഡോക്‌ടര്‍മാര്‍ക്കെതിരായ, കോങ്ങാട് എംഎല്‍എ കെ ശാന്തകുമാരിയുടെ പരാമര്‍ശം വിവാദത്തില്‍. നിങ്ങളുടെ സ്വഭാവം കൊണ്ടാണ് ഇങ്ങനെയൊക്കെ സംഭവിക്കുന്നതെന്നായിരുന്നു എംഎല്‍എയുടെ പരാമര്‍ശം. ഭര്‍ത്താവിന് ചികിത്സ തേടിയെത്തിയ സമയത്താണ് എംഎല്‍എയുടെ ഈ പരാമര്‍ശം. കൊട്ടാരക്കര താലൂക്ക് ആശുപത്രിയിൽ ഡോ. വന്ദന ദാസ് കുത്തേറ്റ് കൊല്ലപ്പെട്ടതിന്‍റെ പശ്ചാത്തലത്തിലാണ് എംഎല്‍എയുടെ പരാമര്‍ശം വിവാദത്തിലായത്.
ALSO READ | ജോലിക്കിടെ വനിത ഡോക്‌ടറെ കുത്തിക്കൊന്നു; ആക്രമിച്ചത് വൈദ്യ പരിശോധനയ്ക്ക് എത്തിച്ച പ്രതി
എംഎല്‍എയുടെ വിവാദ പരാമര്‍ശത്തെ തുടര്‍ന്ന് പ്രതിഷേധവുമായി പാലക്കാട് ജില്ല ആശുപത്രിയിലെ ഡോക്‌ടര്‍മാര്‍ രംഗത്തെത്തി. ഇന്നലെ (മെയ്‌ 11) രാത്രിയാണ് എംഎല്‍എ, പനി ബാധിതനായ ഭര്‍ത്താവിനെയും കൊണ്ട് ആശുപത്രിയില്‍ എത്തിയത്. ഈ സമയത്താണ് എംഎല്‍എ മോശമായി പെരുമാറിയതെന്ന് ഡോക്‌ടര്‍മാര്‍ പറയുന്നു. തെര്‍മോമീറ്റര്‍ ഉപയോഗിക്കാതെയാണ് ഡോക്‌ടര്‍ പരിശോധിച്ചതെന്ന് പറഞ്ഞാണ് എംഎല്‍എ കയര്‍ത്ത് സംസാരിച്ചത്. കൈകൊണ്ട് തൊട്ടുനോക്കിയായിരുന്നു ഡോക്‌ടര്‍ മരുന്ന് കുറിച്ചത്.
പരാതി നല്‍കി കെജിഎംഒഎ : വന്ദന ദാസിന്‍റെ കൊലപാതകത്തിൽ ആരോഗ്യ പ്രവർത്തകര്‍ വലിയ ദുഃഖത്തിലാണ്, ഈ സമയത്താണ് ജനപ്രതിനിധിയുടെ ഭാഗത്തുനിന്നും അധിക്ഷേപ പരാമർശമെന്ന് ഈ ആശുപത്രിയിലെ ഡോക്‌ടര്‍മാര്‍ പറയുന്നു. ഇത് തങ്ങള്‍ക്ക് വലിയ വേദനയുണ്ടാക്കിയെന്നും ഇവര്‍ പറഞ്ഞു. എംഎൽഎയുടെ അധിക്ഷേപത്തിനെതിരെ ആരോഗ്യമന്ത്രിക്കും യൂണിയനുകള്‍ക്കും സര്‍ക്കാര്‍ ഡോക്‌ടർമാരുടെ സംഘടനായ കെജിഎംഒഎ പരാതി നൽകി.
