പാലക്കാട്: പിരായിരി കൊടുന്തരപ്പുള്ളി നവക്കോട് പെട്രോള്‍ പമ്പിന് മുന്നില്‍ യുവാവിനെ വെട്ടിക്കൊന്നു. നവക്കോട് സ്വദേശി എച്ച് ഹക്കീം (39) ആണ് കൊല്ലപ്പെട്ടത്. ബുധനാഴ്‌ച(05.10.2022) രാത്രി എട്ട് മണിയോടെയായിരുന്നു സംഭവം. പെട്രോള്‍ പമ്പിന് മുന്നിലെ ഷെഡില്‍ നില്‍ക്കുകയായിരുന്ന ഹക്കീമിനെ ഒരു സംഘം ആളുകള്‍ എത്തി വെട്ടുകയായിരുന്നു.
കഴുത്തിലും നെഞ്ചിലും കുത്തേറ്റ ഹക്കീമിനെ സുഹൃത്തുക്കള്‍ ചേര്‍ന്ന് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. മൂന്ന് പേരടങ്ങുന്ന സംഘമാണ് എത്തിയതെന്നും ഇതില്‍ ഒരാളാണ് വെട്ടിയതെന്നും ദൃക്‌സാക്ഷികള്‍ പറഞ്ഞു. കത്തിയും കമ്പിയും ഇവരുടെ കൈയ്യിലുണ്ടായിരുന്നുവെന്നുമാണ് ദൃക്‌സാക്ഷികള്‍ പൊലീസിന് നല്‍കിയ മൊഴി.
വ്യക്തിവൈരാഗ്യമാണ് കൊലപാതകത്തിന് കാരണമെന്നാണ് പ്രാഥമിക നിഗമനം. കുത്തിയ വ്യക്തിയെ തിരിച്ചറിഞ്ഞതായും ഇയാള്‍ക്കായി തിരച്ചില്‍ തുടങ്ങിയതായും നോര്‍ത്ത് പൊലീസ് അറിയിച്ചു. കഴുത്തിലും നെഞ്ചിലുമായി മൂന്നിടത്താണ് ഹക്കീമിന് വെട്ടേറ്റിരിക്കുന്നത്.
കൊലപാതകത്തിന് മുമ്പ് പെട്രോള്‍ പമ്പിന് മുന്നില്‍ വച്ച് കുറച്ച് പേരുമായി ഹക്കീം വാക്കുതര്‍ക്കത്തില്‍ ഏര്‍പ്പെട്ടിരുന്നതായും ഇവര്‍ മടങ്ങിയതിന് ശേഷമാണ് ഒരു സംഘമെത്തി കൊലപാതകം നടത്തിയതും എന്നുമാണ് ദൃക്‌സാക്ഷികളുടെ മൊഴിയിലുള്ളത്. നവക്കോട് പെട്രോള്‍ പമ്പിലെ സിസിടിവി ദൃശ്യങ്ങള്‍ പൊലീസ് പരിശോധിച്ചു. ഹക്കീമിന്റെ മൃതദേഹം ജില്ലാ ആശുപത്രിയിലെ മോര്‍ച്ചറിയിലേക്ക് മാറ്റി.
ഇന്ന്(06.10.2020) രാവിലെ പോസ്റ്റ്മാര്‍ട്ടം നടക്കും. തുടര്‍ന്ന് ഇന്ന് തന്നെ മൃതദേഹം സംസ്‌കരിക്കും. പൂക്കച്ചവടമക്കം നിരവധി ജോലികള്‍ ചെയ്യുന്നയാളാണ് ഹക്കീം.
കൊലപാതക വിവരമറിഞ്ഞ് ജില്ല ആശുപത്രിയിലേക്ക് കൊടുന്തരപ്പുള്ളിയില്‍ നിന്ന് നിരവധി പേരാണ് എത്തിയത്. നഗരത്തിലും കൊടുന്തരപ്പുള്ളി, നവക്കോട് മേഖലകളിലും പൊലീസ് വിന്യാസവും ശക്തമാക്കി. തുടര്‍ അക്രമങ്ങള്‍ ഒഴിവാക്കാന്‍ പൊലീസ് ജാഗ്രത പാലിക്കുന്നുണ്ട്. താഹിറയാണ് മരിച്ച ഹക്കീമിന്റെ ഭാര്യ. മകന്‍: മുഹമ്മദ് ഇബ്രാഹിം. ബാപ്പ: മുഹമ്മദ് ഹനീഫ. ഉമ്മ: ഹവാമ.
