മലപ്പുറം: പോക്സോ കേസ് പ്രതി ഷംസുദ്ദീൻ നടക്കാവിൽ നഗരസഭാ കൗൺസിൽ യോഗത്തിൽ പങ്കെടുത്തതിൽ പ്രതിഷേധം. വളാഞ്ചേരി നഗരസഭാ കൗൺസിൽ യോഗത്തിൽ എൽഡിഎഫ് കൗൺസിലർ ഷംസുദ്ദീൻ എത്തിയതോടെ വനിതാ അംഗങ്ങള്‍ കറുത്തവസ്ത്രമണിഞ്ഞ് മുഖംമൂടിക്കെട്ടി നഗരസഭാ ഓഫീസിലെത്തി. പ്രതിയായ കൗണ്‍സിലര്‍ രാജിവയ്ക്കണമെന്നും ഭരണപക്ഷ വനിതാ അംഗങ്ങള്‍ ആവശ്യപ്പെട്ടു. പ്ലക്കാര്‍ഡ് ഉയര്‍ത്തി ഭരണപക്ഷം പ്രതിഷേധം അറിയിച്ചു. അതേസമയം നഗരസഭ ചെയര്‍പേഴ്‌സണ്‍ സി കെ റുഫീനയുടെ അധ്യക്ഷതയില്‍ കൗണ്‍സില്‍ യോഗം ചേര്‍ന്നു. യോഗത്തില്‍ ഷംസുദ്ദീന്‍ പങ്കെടുത്തത് വീണ്ടും പ്രതിഷേധമുയരാന്‍ കാരണമായി. ഇതോടെ യോഗത്തിൽ നിന്ന് മാറി നിൽക്കാൻ ചെയർപേഴ്‌സൺ ആവശ്യപ്പെട്ടു. ഷംസുദ്ദീന്‍റെ രാജി ആവശ്യപ്പെട്ടുള്ള ചർച്ച വാക്കേറ്റമായതോടെ ഷംസുദ്ദീൻ യോഗത്തിൽ നിന്ന് ഇറങ്ങിപ്പോയി. മാധ്യമങ്ങളോട് സംസാരിക്കാനും കൗൺസിലർ തയ്യാറായില്ല.
പോക്സോ കേസ് പ്രതി ഷംസുദ്ദീൻ നഗരസഭാ യോഗത്തിൽ പങ്കെടുത്തതിൽ പ്രതിഷേധം
