മലപ്പുറത്തിന്‍റെ ഉറുദു അധ്യാപകൻ ഡോ. പി.കെ ശംസുദ്ദീൻ

ഉറുദു ഭാഷയ്ക്ക് വേണ്ടി ജീവിക്കുന്ന അധ്യാപകനെ പരിചയപ്പെടാം.

മലപ്പുറം: മലപ്പുറത്തുകാര്‍ക്ക് സുപരിചിതനാണ് ഷമ്മു മാസ്റ്റര്‍. യഥാര്‍ഥ പേര് ഡോ.പി.കെ ശംസുദ്ദീൻ എന്നാണെങ്കിലും നാട്ടുകാര്‍ക്കും വിദ്യാര്‍ഥികള്‍ക്കും വിളിക്കാൻ ഇഷ്ടം ഷമ്മു മാസ്റ്ററെന്നാണ്. ഉറുദു ഭാഷാ ഗവേഷണത്തിനും പ്രചാരണത്തിനുമായി തന്‍റെ ജീവിതം തന്നെ മാറ്റി വച്ച ശംസുദ്ദീന്‍ അംഗപരിമിതനാണ്. മുംബൈയില്‍ ജനിച്ചു വളര്‍ന്ന മലയാളിയായ ഈ അധ്യാപകനിന്ന് ഉറുദു സംഘടനകളുടെ ദേശീയ ഭാരവാഹിയാണ്. കൊട്ടാരപ്പറമ്പിൽ മുഹ്‌യുദ്ദീന്‍റെയും, അമ്പലകുത്ത് കുരിക്കൾ ഫാത്തിമയുടെയും നാല് മക്കളിൽ ഇളയവനായി മുംബൈയിലാണ് അദ്ദേഹം ജനിച്ചത്.

വിദ്യാഭ്യാസമെല്ലാം അവിടെത്തന്നെ പൂര്‍ത്തിയാക്കിയെങ്കിലും ഉറുദുവിന്‍റെ പോലെ മലയാള ഭാഷയും അദ്ദേഹം നെഞ്ചോട് ചേര്‍ത്തുവച്ചിരുന്നു. വീട്ടില്‍ മലയാളം സംസാരിക്കണമെന്ന പിതാവിന്‍റെ വാശിയാണ് അതിന് കാരണമെന്ന് ശംസുദ്ദീൻ പറയുന്നു. പഠനത്തോടൊപ്പം ഉറുദു പത്രത്തില്‍ ജോലി ചെയ്യാൻ അവസരം ലഭിച്ചതാണ് ശംസുദ്ദീന്‍റെ ജീവിതത്തില്‍ വഴിത്തിരിവായത്. തുടര്‍ന്ന് ഉറുദു മാസികകളിലും, ആഴ്‌ചപതിപ്പുകളിലും ലേഖനങ്ങളും കവിതകളും എഴുതി തുടങ്ങി. ഇതിനിടെ ഉറുദു ഭാഷയില്‍ ബിരുദാനന്തര ബിരുദം നേടിയെടുക്കുകയും കേരളത്തിൽ ഉറുദു ഭാഷയുടെ ചരിത്രവും, വർത്തമാനവും എന്ന വിഷയത്തില്‍ മൈസൂർ യൂണിവേഴ്സിറ്റിയിൽ നിന്നും ഡോക്ടറേറ്റ് നേടുകയും ചെയ്തു ഈ അധ്യാപകൻ. ഇക്കാലയളവില്‍ ഉറുദു ഭാഷയില്‍ നിരവധി ലേഖനങ്ങളും എഴുതിയിട്ടുണ്ട്. ദൂരദര്‍ശനടക്കമുള്ള ചാനലുകളില്‍ ഇദ്ദേഹത്തിന്‍റെ ദസ്താൻ ഇ ഉറുദു എന്ന പ്രോഗ്രാം വിവിധ എപ്പിസോഡുകളിലായി സംപ്രേഷണവും ചെയ്യുന്നുണ്ട്. ഉറുദു പാഠപുസ്തക നിർമാണ കമ്മിറ്റിയിലുള്‍പ്പെടെ വിവിധ ഉറുദു കമ്മിറ്റികളില്‍ മുഖ്യ സ്ഥാനം വഹിക്കുന്നുണ്ട്. നാലോളം സംസ്ഥാനങ്ങളിൽ നിന്നായി 12 അവാർഡുകളും ഇദ്ദേഹം നേടിയിട്ടുണ്ട്.