മലപ്പുറം: മൈതാനത്തും പുഴയിലും കക്കൂസ് മാലിന്യം തള്ളിയ നിലയിൽ. മേലാറ്റൂരിലെ ഒലിപ്പുഴയിലും, സമീപത്തുള്ള മൈതാനത്തുമാണ്‌ മാലിന്യം തള്ളിയത്. ശനിയാഴ്ച രാവിലെ കളിക്കാനെത്തിയ കുട്ടികളാണ് മൈതാനത്ത് മാലിന്യം തള്ളിയിരിക്കുന്നതായി കണ്ടത്. രണ്ട് ലോഡിലധികം കക്കൂസ് മാലിന്യമാണ് രാത്രിയിൽ തള്ളിയതെന്ന് നാട്ടുകാർ പറഞ്ഞു.
ഞായറാഴ്ച കുട്ടികൾക്കായി ഫുട്‌ബോൾ പരിശീലനക്യാമ്പ് നടക്കാനിരിക്കുന്ന മൈതാനത്താണ് കക്കൂസ് മാലിന്യം തള്ളിയത്. നിരവധിപേർ കുളിക്കുന്നതിനും വസ്ത്രങ്ങൾ അലക്കുന്നതിനുമായി ആശ്രയിക്കുന്ന പുഴയാണ് മലിനമായത്. പൊലീസ് സ്ഥലത്തെത്തി പരിശോധന നടത്തി.
