മലപ്പുറം: കവളപ്പാറയിൽ ഉണ്ടായ വൻദുരന്തത്തിന് കാരണം മനുഷ്യന്‍റെ നിർമാണ പ്രവൃത്തികളെന്ന് പ്രദേശവാസികൾ. മണ്ണിടിച്ചിൽ ഉണ്ടായ മുത്തപ്പൻ കുന്നിന് മുകളിൽ റബ്ബർ കൃഷിക്ക് വേണ്ടി വലിയ കുഴികൾ നിർമ്മിച്ചതാണ് മലയിടിയാൻ കാരണമെന്ന് നാട്ടുകാർ പറയുന്നു. കാലവർഷം കനത്തതോടെ മണ്ണിടിച്ചിലിന് ഈ വിള്ളൽ കാരണമായെന്നും പ്രദേശവാസികൾ പറയുന്നു.
മണ്ണുനീക്കി യന്ത്രങ്ങളുപയോഗിച്ച് രണ്ടുവർഷം മുമ്പാണ് മുത്തപ്പൻ കുന്നിൻ ചെരിവുകളിൽ റബ്ബർകൃഷിക്കായി കുഴിയെടുത്തത്. ഈ കുഴികളിൽ വലിയ തോതിൽ വെള്ളം കെട്ടിനിൽക്കുകയും ചെയ്തിരുന്നു. ഏക്കർ കണക്കിന് സ്ഥലത്താണ് ഇത്തരത്തിൽ കുഴികൾ നിർമ്മിച്ചത്. നാട്ടുകാരുടെ ശക്തമായ പ്രതിഷേധത്തെ അവഗണിച്ചായിരുന്നു ഈ പ്രവർത്തനങ്ങൾ നടന്നിരുന്നത്. നാട്ടുകാരുടെ പ്രതിഷേധത്തെ മറികടക്കാൻ അനധികൃത ഇടപെടൽ ഉണ്ടായെന്നും ആരോപണമുണ്ട്.
