മലപ്പുറം: തെരുവുനായയുടെ ആക്രമണത്തില്‍ മൂന്ന് പേര്‍ക്ക് പരിക്കേറ്റു. കെഎസ്ഇബി ഓവര്‍സിയര്‍ പി.ആര്‍. ജോര്‍ജ്, അധ്യാപികയായ ദിവ്യ, ദിവ്യയുടെ പിതാവ് ചന്ദ്രകാന്തന്‍ എന്നിവര്‍ക്കാണ് തെരുവ് നായയുടെ കടിയേറ്റത്.
വീട്ടില്‍ പതിവായി എത്താറുള്ള നായ ജോർജിനെ കടിച്ച ശേഷം മുറ്റത്ത് കിടന്നിരുന്ന ബൈക്കിന്‍റെ സീറ്റും കടിച്ചു കീറി. പിന്നീട് തൊട്ടടുത്ത വീട്ടിൽ താമസിക്കുന്ന അധ്യാപികയേയും പിതാവിനെയും കടിക്കുകയായിരുന്നു. ഏറെനേരം പ്രദേശത്ത് ഭീതി പടർത്തിയ നായയെ പിന്നീട് എടവണ്ണ പോലീസ് സ്റ്റേഷനിൽ നിന്നും ട്രോമാ കെയർ പ്രവർത്തകരും അഗ്നി രക്ഷാസേനയും എത്തി നാട്ടുകാരുടെ സഹായത്തോടെ പിടികൂടി. പരിക്കേറ്റവരെ മഞ്ചേരി മെഡിക്കൽ കോളജ് ആശുപത്രിയില്‍ പ്രവേശിപ്പിച്ചു.
