ആറുവയസുകാരിയെ പിതാവ് പീഡിപ്പിച്ചു; പൊലീസ് നടപടിയെടുത്തില്ലെന്ന് പരാതി

ആശുപത്രിയിൽ നിന്നുള്ള രേഖകളും കുട്ടിയുടെ മൊഴിയും പിതാവിനെതിരെ ആയിരുന്നെന്നും കുട്ടിയുടെ മാതാവിന്‍റെ ബന്ധുക്കൾ പറഞ്ഞു.

മലപ്പുറം: ആറ് വയസുകാരിയായ മകളെ പിതാവ് പീഡിപ്പിച്ച കേസിൽ പൊലീസ് നടപടിയെടുത്തില്ലെന്ന് പരാതി. കുട്ടിയുടെ മാതാവിന്‍റെ മാതാപിതാക്കളാണ് പരാതിയുമായി രംഗത്തെത്തിയത്. 2018 ഡിസംബറില്‍ പെരിന്തൽമണ്ണ പൊലീസ് പോസ്കോ നിയമപ്രകാരം കേസെടുത്തിരുന്നു. എന്നാല്‍ കുറ്റാരോപിതനായ പിതാവിനെ അറസ്റ്റ് ചെയ്യാനോ മറ്റ് നടപടികൾ എടുക്കാനോ പൊലീസ് തയ്യാറായില്ല എന്നാണ് ബന്ധുക്കളുടെ ആരോപണം.

മാതാവിന്‍റെ മരണ ശേഷം കുടുംബ കോടതിയുടെ ഉത്തരവുപ്രകാരം കുട്ടി പെരിന്തൽമണ്ണ സ്വദേശിയായ പിതാവിന്‍റെ കൂടെ കഴിഞ്ഞിരുന്നു. ഈ സമയത്താണ് കുട്ടിയെ പിതാവ് പീഡിപ്പിച്ചതെന്നും ബന്ധുക്കൾ പറഞ്ഞു. ആശുപത്രിയിൽ നിന്നുള്ള രേഖകളും കുട്ടിയുടെ മൊഴിയും പിതാവിനെതിരെയായിരുന്നെന്നും ഇവർ വ്യക്തമാക്കി. കുട്ടിയുടെ മാതാവ് ദുരൂഹസാഹചര്യത്തിൽ മരിച്ചതാണെന്ന കേസും നിലവിലുണ്ട്. ഈ കേസില്‍ ക്രൈംബ്രാഞ്ച് അന്വേഷണം നടത്തിവരികയാണ്.