മലപ്പുറം: താനൂരിൽ നിരവധി വിദ്യാർഥികൾക്കെതിരെ ലൈംഗികാതിക്രമം നടത്തിയ സർക്കാർ സ്‌കൂൾ അധ്യാപകൻ അറസ്റ്റിൽ. വള്ളിക്കുന്ന് സ്വദേശി പുളിക്കത്തൊടിതാഴം അഷ്റഫിനെയാണ് (53) പോക്‌സോ കേസിൽ താനൂർ പൊലീസ് അറസ്റ്റ് ചെയ്‌തത്. മൂന്നാം തവണയാണ് ഇയാൾ സമാന കുറ്റത്തിന് അറസ്റ്റിലാവുന്നത്.
ആൺകുട്ടികളെ പ്രകൃതിവിരുദ്ധ പീഡനത്തിന് ഇരയാക്കിയ കേസിലാണ് മൂന്ന് തവണയും ഇയാൾ അറസ്റ്റ് ചെയ്യപ്പെട്ടത്. 2012ൽ പരപ്പനങ്ങാടി പൊലീസ് സ്റ്റേഷൻ പരിധിയിലെ സ്‌കൂളിൽ സമാന കുറ്റത്തിന് അഷ്‌റഫ് അറസ്റ്റിലായിരുന്നു. അന്ന് പോക്‌സോ നിയമം നിലവിലില്ലാത്തതിനാൽ ബന്ധപ്പെട്ട ഐപിസി വകുപ്പുകൾ പ്രകാരമാണ് കേസെടുത്തിരുന്നത്.
അഞ്ച് വർഷങ്ങൾക്കു ശേഷം കുറ്റവിമുക്‌തനാക്കപ്പെട്ട പ്രതി കരിപ്പൂർ പൊലീസ് സ്റ്റേഷൻ പരിധിയിലെ സ്‌കൂളിൽ ജോലി നോക്കവെ 2019ൽ രക്ഷിതാക്കൾ ഇയാൾക്കെതിരെ ലൈംഗികാതിക്രമം നടത്തിയെന്ന പരാതിയുയർത്തി. പരാതിയിൽ കരിപ്പൂർ പൊലീസ് പോക്‌സോ നിയമപ്രകാരം കേസ് രജിസ്റ്റർ ചെയ്‌ത് ഇയാളെ റിമാൻഡ് ചെയ്‌തു.
ഈ കേസിൽ ജാമ്യത്തിലിറങ്ങിയ ശേഷമാണ് പ്രതി താനൂരിലെ സ്‌കൂളിൽ ജോലിക്ക് പ്രവേശിക്കുന്നത്. വിദ്യാർഥികളെ ലൈംഗിക ചൂഷണത്തിന് വിധേയരാക്കിയ കേസിൽ രണ്ട് കേസുകൾ നിലവിലിരിക്കെയാണ് അഷ്‌റഫ് താനൂരിലും സമാന കേസിൽ അറസ്റ്റിലാകുന്നത്.
