മലപ്പുറം : രൂപമാറ്റം വരുത്തിയ വാഹനം പിടികൂടി ജില്ല മോട്ടോർ വാഹന വകുപ്പ്. ഒരു കോളജില്‍ ഓണാഘോഷത്തിനായാണ് വാഹനം എത്തിച്ചത്. ഇത്തരം വാഹനങ്ങള്‍ നിരത്ത് കൈയ്യടക്കുന്നുവെന്ന വിവരത്തെ തുടർന്ന് പുത്തനത്താണിയിൽ നടത്തിയ പരിശോധനയിലാണ് നടപടി.
പഴയ ഹോണ്ട സിവിൽ കാർ ആണ് ലക്ഷങ്ങൾ ചിലവഴിച്ച് രൂപമാറ്റം വരുത്തി വിദ്യാർഥികൾ സഞ്ചരിച്ചിരുന്നത്. ഡോറും ബമ്പറും പുതിയ രൂപത്തിലാണ്. ഇതോടെ കാര്‍ എംവിഐ മുഹമ്മദ് ഷഫീഖിൻറെ നേതൃത്വത്തിൽ ഉദ്യോഗസ്ഥർ കസ്റ്റഡിയിലെടുക്കുകയായിരുന്നു.
പരിശോധന കര്‍ശനമാക്കും : ഓണാഘോഷം അതിരുകടക്കാതിരിക്കാൻ എല്ലാ ക്യാമ്പസുകളിലും മോട്ടോർ വാഹന വകുപ്പിന്‍റെ എൻഫോഴ്സ്മെൻറ് ഉദ്യോഗസ്ഥര്‍ പരിശോധന നടത്താന്‍ ആര്‍ടിഒ പ്രമോദ് കുമാർ നിർദേശം നല്‍കിയിട്ടുണ്ട്. ഇതിന്‍റെ അടിസ്ഥാനത്തിൽ പുത്തനത്താണിയിലെ ഒരു സ്വകാര്യ കോളജിന്‍റെ പരിസരത്ത് പരിശോധന നടത്തുമ്പോഴാണ് ക്യാമ്പസിനകത്ത് രൂപമാറ്റം വരുത്തിയ കാര്‍ കണ്ടെത്തിയത്.
പിടികൂടിയ വാഹനം കൽപകഞ്ചേരി സ്റ്റേഷനിലേക്ക് മാറ്റി. പതിനെണ്ണായിരം രൂപ പിഴ അടക്കാൻ നിർദേശം നൽകിയിട്ടുണ്ട്. പഴയ രൂപത്തിലാക്കി ആര്‍സി ഹാജരാക്കുകയും വേണം. എഎംവിഐ സുരേഷ് കെ വിജയൻ, സജീഷ് മേലേപ്പാട്ട് എന്നിവരും പരിശോധനയ്ക്ക് നേതൃത്വം നൽകി. ഓണാഘോഷത്തിന്റെ ഭാഗമായി ക്യാമ്പസുകൾ കേന്ദ്രീകരിച്ച് പരിശോധന ശക്തമാക്കാനാണ് മോട്ടോർ വാഹന വകുപ്പിന്‍റെ തീരുമാനം.
