മലപ്പുറം: കാണാനും ആസ്വദിക്കാനും സഞ്ചാരികളാരുമില്ല...പക്ഷേ മലപ്പുറത്തെ കോട്ടക്കുന്ന് ഉദ്യാനം ഈ ലോക്ക് ഡൗണ്‍ കാലത്തും പൂക്കളാലും പൂമ്പാറ്റകളാലും സമ്പന്നമാണ്. സഞ്ചാരികളുടെ തിരക്കില്ലാത്തതിന്‍റെ പരിഭവം പങ്കുവെക്കുമ്പോഴും പൂത്തുലഞ്ഞുനില്‍ക്കുന്ന ഉദ്യാനത്തിന്‍റെ ഭംഗി ആസ്വദിക്കുകയാണ് പരിപാലകർ.
പൂക്കളും പൂമ്പാറ്റകളും വിരുന്നെത്തുന്ന പക്ഷികളും; ലോക്ക് ഡൗണ്‍ കാലത്തെ കോട്ടക്കുന്ന് ഉദ്യാനം
പൂവിട്ടുനില്‍ക്കുന്ന അലങ്കാര ചെടികളും വട്ടമിട്ടു പറക്കുന്ന പൂമ്പാറ്റകളും ഉദ്യാനത്തിന് ജീവന്‍ നല്‍കുന്നു. രാവിലെയും വൈകിട്ടും നിത്യസന്ദര്‍ശകരായെത്തുന്ന മയിലും വേഴാമ്പലുമെല്ലാം ഉദ്യാനത്തെ കൂടുതല്‍ മനോഹരമാക്കുന്നു. ലോക്ക് ഡൗണിനെ തുടര്‍ന്ന് മൂന്ന് മാസമായി അടച്ചിട്ടിരിക്കുകയായിരുന്നു ജില്ലാ ആസ്ഥാനത്തെ ഈ ജനകീയ ഉദ്യാനം. മഴക്കാലം എത്തിയതോടെ പൂത്തുലഞ്ഞുനിൽക്കുന്ന കോട്ടക്കുന്ന് പാർക്ക് ഇതേ ഭാവത്തിൽ സഞ്ചാരികൾക്ക് തുറന്നുകൊടുക്കാനുള്ള ഒരുക്കത്തിലാണ് ജീവനക്കാര്‍.
