ഉരുൾപ്പൊട്ടലിനെ തുടർന്ന് മുപ്പതോളം വീടുകൾ മണ്ണിനടിയിലായ കവളപ്പാറയില്‍ രക്ഷാപ്രവർത്തനം വൈകുന്നു. കനത്ത മഴയും ഒപ്പം തുടർച്ചയായുള്ള മണ്ണിടിച്ചിലും കാരണം സൈന്യത്തിന് ഇതുവരെ ഈ പ്രദേശത്തേക്ക് എത്താൻ സാധിച്ചിട്ടില്ല. 46 പേരോളം മണ്ണിനടിയില്‍ കുടുങ്ങി കിടക്കുന്നതായാണ് സൂചന.
നിലവില്‍ ദേശീയ ദുരന്ത നിവാരണ സേനയുടെ ചെറിയ സംഘമാണ് ഇവിടെ രക്ഷാപ്രവർത്തനം നടത്തുന്നത്. രക്ഷാപ്രവര്‍ത്തനത്തിനായി ഒരു ജെസിബി മാത്രമേ ഇവിടേക്ക് എത്തിക്കാന്‍ സാധിച്ചിട്ടുള്ളൂ. ഇന്നലെ രാത്രി എട്ടരയോടെയാണ് പ്രദേശം ദുരന്തഭൂമിയായത്. നൂറേക്കറോളം സ്ഥലത്താണ് ഉരുൾപൊട്ടല്‍ ഉണ്ടായത്. ഒരു ഭാഗത്ത് നിന്ന് മണ്ണിടിച്ചിലും മറുഭാഗത്ത് നിന്ന് ഉരുൾപൊട്ടലും ഉണ്ടായതോടെ ഇവിടുത്തെ കുടുംബങ്ങൾ പൂര്‍ണ്ണമായും ദുരന്തത്തില്‍ അകപ്പെടുകയായിരുന്നു. കേരളത്തിലെ ഉരുൾപൊട്ടലുകളുടെ ചരിത്രത്തിലെ ഏറ്റവും ഭീതിയേറിയ ഉരുൾപൊട്ടലാണ് കവളപ്പാറയില്‍ ഉണ്ടായത്. ദുരന്തം സംഭവിച്ച് രണ്ട് ദിവസം പിന്നിട്ടതിനാല്‍ കുടുങ്ങി കിടക്കുന്നവരെ ജീവനോടെ രക്ഷിക്കാമെന്ന പ്രതീക്ഷ അസ്തമിച്ചിരിക്കുകയാണ്.
