മലപ്പുറം: മലപ്പുറം ചെനക്കല്‍ അയ്യങ്കാളി എസ്‌സി കോളനിയിൽ കുടിവെള്ള പദ്ധതി നടപ്പാക്കാനൊരുങ്ങി ജില്ലാ പഞ്ചായത്ത്. പദ്ധതിയിലൂടെ 75 ഓളം കുടുംബങ്ങൾക്ക് കുടിവെള്ളം ലഭ്യമാക്കും. 2019-2020 വര്‍ഷത്തെ പദ്ധതിയില്‍ 25 ലക്ഷം രൂപ ചെലവഴിച്ചാണ് കുടിവെള്ള പദ്ധതി നടപ്പാക്കുന്നത്. പദ്ധതിയുടെ ഉദ്ഘാടനം ജില്ലാ പഞ്ചായത്ത് പ്രസിഡൻ്റ് എ.പി ഉണ്ണികൃഷ്ണന്‍ നിർവഹിച്ചു.
ചെനക്കല്‍ അയ്യങ്കാളി കോളനിയിൽ കുടിവെള്ള പദ്ധതി
2019 ല്‍ പൂർത്തിയാക്കേണ്ട പദ്ധതി കിണര്‍ കുഴിക്കുന്നതുമായി ബന്ധപ്പെട്ടുള്ള തര്‍ക്കത്തെ തുടര്‍ന്ന് നിര്‍ത്തിവച്ചിരിക്കുകയായിരുന്നു. ഈ പ്രശ്‌നത്തിനാണ് ഇപ്പോൾ പരിഹാരമായിരിക്കുന്നത്. ചടങ്ങില്‍ ജില്ലാ പഞ്ചായത്തംഗം എ.കെ അബ്‌ദുൾറഹ്‌മാന്‍ അധ്യക്ഷത വഹിച്ചു. ഗ്രാമ പഞ്ചായത്തംഗം കെ നാരായണി, അഡ്വ.കെ കുഞ്ഞാലിക്കുട്ടി, പി രാജന്‍, ധര്‍മ്മരാജന്‍, ബാലകൃഷ്ണന്‍, കെ എറമുട്ടി, സുബ്രഹ്മണ്യന്‍ എന്നിവർ സംസാരിച്ചു.
