മലപ്പുറം: വിവിധ മദ്രസകളുടെയും കമ്മിറ്റികളുടെയും നേതൃത്വത്തിൽ വിപുലമായ രീതിയിൽ നബിദിനം ആഘോഷിച്ചു. നബി ദിനത്തിൻ്റെ ഭാഗമായി വിവിധ മത സംഘടനകളുടെയും മഹല്ല് കമ്മിറ്റികളുടെയും നേതൃത്വത്തിലാണ് വിപുലമായ ആഘോഷ പരിപാടികൾ സംഘടിപ്പിച്ചത്.
മദ്രസകൾ കേന്ദ്രീകരിച്ചുള്ള ആഘോഷങ്ങളിൽ പ്രവാചക കീർത്തനങ്ങൾ, നബിദിന സന്ദേശറാലി, മതപ്രഭാഷണങ്ങൾ, വിദ്യാർഥികളുടെ കലാപരിപാടികൾ, ഭക്ഷണ വിതരണം തുടങ്ങിയ ചടങ്ങുകളും നടന്നു. പ്രവാചക കീർത്തനങ്ങളുമായി പള്ളികളിലും വീടുകളിലും മൗലൂദ് ചടങ്ങുകളും സംഘടിപ്പിച്ചിരുന്നു. വിവിധ പാർട്ടികളും സംഘടനകളും നബിദിനാഘോഷത്തിൻ്റെ ഭാഗമായി പ്രത്യേക പരിപാടികളും ഒരുക്കി. പല സ്ഥലങ്ങളിലും വഴിയാത്രക്കാർക്ക് മധുര പലഹാരങ്ങളും ശീതളപാനീയങ്ങളും വിതരണം ചെയ്തു. പ്രവാചകൻ്റെ ജന്മദിനത്തിൻ്റെ ഭാഗമായി വിവിധ മേഖലകൾ കേന്ദ്രീകരിച്ച് റബി ഉൽ അവ്വൽ ആഘോഷങ്ങൾ 30 ദിവസം സംഘടിപ്പിച്ചിട്ടുണ്ട്.
