കോഴിക്കോട്:ഗുജറാത്ത് സ്ട്രീറ്റിലെ ഗുദാം ആർട്ട് ഗാലറിക്ക് ഇപ്പോൾ വിവിധതരം സോപ്പുകളുടെ ഗന്ധമാണ്. ബിജുവിന്റെ കരവിരുതില് വിരിഞ്ഞ സോപ്പുശില്പങ്ങളില് നിന്നുമുയരുന്ന ഗന്ധം. ശില്പകലയിലെ വ്യത്യസ്തമായൊരു ചുവടുവെപ്പാണ് തിരുവനന്തപുരം സ്വദേശിയും ആനിമേഷന് അധ്യാപകനുമായ സി.ജി ബിജുവിന്റേത്. സോപ്പിൽ വളരെ സൂക്ഷ്മമായി രൂപരേഖ വരച്ചാണ് ബിജു ശില്പങ്ങള് തീര്ക്കുന്നത്. ഇതുവരെ മുന്നൂറിൽപരം ശിൽപങ്ങളാണ് ഇത്തരത്തില് നിർമിച്ചിരിക്കുന്നത്. ഇതില് എണ്പതിലധികം സോപ്പുശില്പങ്ങള് പ്രദര്ശനത്തില് ഇടംപിടിച്ചിട്ടുണ്ട്. ഒപ്പം ബിജുവിന്റെ മൂവായിരത്തിലേറെയുള്ള ഫോട്ടോകളിൽ നിന്നും തെരഞ്ഞെടുത്ത 50 ഫോട്ടോകളുടെ പ്രദർശനവുമുണ്ട്.
ഗാന്ധിജിയും അബ്ദുൽകലാമും ദൈവങ്ങളുമടക്കം നിരവധി രൂപങ്ങളാണ് അതിസൂക്ഷ്മതയോടെ നിർമിച്ചിരിക്കുന്നത്. മണൽ, സ്പോഞ്ച്, തെർമോകോൾ, പെൻസിൽ തുടങ്ങിയവയിൽ നിന്നും ശിൽപങ്ങൾ നിർമിച്ചിട്ടുണ്ടെങ്കിലും മറ്റുള്ളവരിൽ നിന്നും വ്യത്യസ്തമായി ശിൽപങ്ങൾ നിര്മിക്കണമെന്ന ആഗ്രഹത്തോടെയാണ് സോപ്പുശില്പങ്ങള് നിർമിക്കാൻ ആരംഭിച്ചതെന്ന് ബിജു പറഞ്ഞു. സോപ്പുശില്പങ്ങള് നിര്മ്മിക്കുന്നതിനേക്കാള് ബുദ്ധിമുട്ടാണ് ഇവ സൂക്ഷിക്കുന്നതിന്. അതിനാൽ ഓരോ ശില്പങ്ങളും പ്രത്യേകമായി നിര്മിച്ച ചില്ലുപെട്ടികളിലാണ് സൂക്ഷിക്കുന്നത്. ഖത്തർ, തിരുവനന്തപുരം, കോഴിക്കോട് എന്നീ സ്ഥലങ്ങളിൽ സോപ്പുശില്പങ്ങളുടെ പ്രദർശനം നടത്തിയിട്ടുണ്ട്. ഗുദാം ആര്ട്ട് ഗാലറിയില് നടക്കുന്ന സോപ്പ് കാര്വിങ് ശില്പ പ്രദര്ശനം ഇരുപതിന് സമാപിക്കും.