കോഴിക്കോട് : വാക്സിൻ സ്വീകരിക്കാത്ത യുവാവിന് ഹരിയാനയിൽ നിന്നും കുത്തിവയ്പ്പ് ലഭിച്ചതായി മൊബൈല്‍ ഫോണ്‍ സന്ദേശം. കൂടരഞ്ഞി പഞ്ചായത്തിലെ കൂമ്പാറ സ്വദേശി വടക്കേടത്ത് സുനേഷ് ജോസഫിന് ജൂൺ 29 നാണ് മെസേജ് വന്നത്. താങ്കളുടെ കൊവിഡ് വാക്‌സിന്‍റെ ഒന്നാം ഡോസ് വിജയകരമായി പൂർത്തിയായി എന്നായിരുന്നു മെസേജ്.
ലിങ്കില്‍ കയറി പരിശോധിച്ചപ്പോള്‍ കിറുകൃത്യം...!
വാക്സിൻ ലഭിക്കാന്‍ രജിസ്റ്റർ ചെയ്തതല്ലാതെ കുത്തിവയ്പ്പ് സ്വീകരിക്കാത്ത തനിക്ക് എങ്ങനെയാണ് ഈ സന്ദേശം ലഭിച്ചതെന്ന സംശയത്താല്‍ ലിങ്കിൽ കയറി പ്രിന്‍റ് എടുത്തുനോക്കിയപ്പോൾ പാസ്പോര്‍ട്ട് നമ്പർ, പേര്, വയസ് ബെനിഫിഷരി നമ്പർ എല്ലാം ശരിയാണെന്ന് യുവാവ് പറയുന്നു.
ജൂൺ 29 ന് ഹരിയാനയിലെ പാൽറ പി.എച്ച്.സി ഒന്നില്‍ നിന്നും കൊവിഷീൽഡ് വാക്സിൻ സ്വീകരിച്ചെന്നാണ് സർട്ടിഫിക്കറ്റിൽ ഉള്ളത്.
വിവരങ്ങള്‍ ചോര്‍ത്തിയതെന്ന് സംശയം
വാക്സിൻ സ്വീകരിക്കാതെ കുത്തിവയ്പ്പ് സ്വീകരിച്ചെന്ന സർട്ടിഫിക്കറ്റ് ലഭിച്ച ആശങ്കയിലാണ് സുനേഷ് ജോസഫ്. ഈ കാരണം കൊണ്ട് തനിക്കിനി ഒന്നാം ഡോസ് എടുക്കാൻ പറ്റില്ലേയെന്നും തങ്ങളുടെ രഹസ്യവിവരങ്ങൾ ആരോ ചോർത്തി ഇത്തരത്തിൽ ചെയ്യുന്നതാണോ എന്നുമുള്ള ആശങ്കയും ഇദ്ദേഹം ഉന്നയിക്കുന്നു. ആരോഗ്യ വകുപ്പിന് പരാതി നൽകാൻ തയ്യാറെടുക്കുകയാണ് സുനേഷ്.
