കോഴിക്കോട്: കുതിരവട്ടം മാനസികാരോഗ്യ കേന്ദ്രത്തിൽ നിന്നും രക്ഷപ്പെട്ട കൊലക്കേസ് പ്രതിയെ കണ്ടെത്തി. പെരിന്തൽമണ്ണ ദൃശ്യ കൊലക്കേസ് പ്രതി വിനീഷാണ് ഞായറാഴ്‌ച (ഓഗസ്റ്റ് 14) മാനസികാരോഗ്യ കേന്ദ്രത്തില്‍ നിന്നും രക്ഷപ്പെട്ടത്. കർണാടകത്തിലെ ധർമസ്ഥലയിൽ നിന്ന് തിങ്കളാഴ്‌ച രാത്രി 10മണിക്കാണ് ഇയാളെ പൊലീസ് പിടികൂടിയത്. അറസ്റ്റിലായ പ്രതിയെ ഇന്ന് ഉച്ചയോടെ കോഴിക്കോടെത്തിക്കും.
വിനീഷ് രക്ഷപ്പെട്ടതിനെ തുടര്‍ന്ന് റയില്‍വേ സ്റ്റേഷനിലെ സിസിടിവി ദൃശ്യങ്ങള്‍ കേന്ദ്രീകരിച്ച് നടത്തിയ പരിശോധനയിലാണ് മംഗലാപുരത്തേക്ക് ട്രെയിൻ കയറിയതായി കണ്ടെത്തിയത്. തുടര്‍ന്ന് മംഗലാപുരത്തെത്തിയ പ്രതി ബൈക്ക് മോഷ്‌ടിച്ച് പോകുന്നതിനിടെ ധർമസ്ഥലയിൽ വച്ച് ബൈക്കിലെ ഇന്ധനം തീര്‍ന്നു. ഇതോടെ അവിടെ നിന്ന് മറ്റൊരു വാഹനം മോഷ്‌ടിക്കാന്‍ ശ്രമിക്കുന്നതിനിടെയാണ് പൊലീസ് ഇയാളെ അറസ്റ്റ് ചെയ്‌തത്.
വധക്കേസിൽ ശിക്ഷിക്കപ്പെട്ട് കണ്ണൂർ സെൻട്രൽ ജയിലിലായിരുന്ന വിനീഷിനെ മാനസികാസ്വാഥ്യം പ്രകടിപ്പിച്ചതിനെ തുടർന്ന് ദിവസങ്ങൾക്ക് മുമ്പാണ് കുതിരവട്ടം മാനസികാരോഗ്യ കേന്ദ്രത്തിലെത്തിച്ചത്. മൂന്ന് മാസത്തിനിടെ ഇത് രണ്ടാം തവണയാണ് കുതിരവട്ടം മാനസികാരോഗ്യ കേന്ദ്രത്തിലെ ഫോറൻസിക് വാർഡിൽ നിന്ന് തടവുകാരനായ അന്തേവാസി പുറത്തുകടക്കുന്നത്.
also read: വീണ്ടും സുരക്ഷാവീഴ്‌ച, കുതിരവട്ടം മാനസികാരോഗ്യ കേന്ദ്രത്തില്‍ നിന്ന് അന്തേവാസി രക്ഷപ്പെട്ടു
