കോഴിക്കോട് : രണ്ടുമാസം മുൻപ് കൊടുവള്ളിയിലെ സംഘത്തിനു വേണ്ടി കൊണ്ടുവന്ന സ്വർണം കണ്ണൂർ സംഘമാണ് കൊണ്ടുപോയതെന്ന്‌ തട്ടിക്കൊണ്ടുപോകപ്പെട്ട അഷ്റഫിന്‍റെ മൊഴി. പകരം പത്ത്‌ ലക്ഷം രൂപ ലഭിച്ചെന്നും ഇയാള്‍ അന്വേഷണസംഘത്തോട് പറഞ്ഞു. സ്വർണം തിരിച്ചു നൽകണമെന്നാവശ്യപ്പെട്ട്‌ കൊടുവള്ളി സംഘമാണ് അഷ്റഫിനെ തട്ടിക്കൊണ്ടുപോയത്.
ടിപി വധക്കേസ് പ്രതി കൊടി സുനിയുടേതെന്ന് കരുതുന്ന ശബ്ദസന്ദേശം അഷ്റഫിന്‍റെ ഫോണിൽ നിന്നും പൊലീസ് കണ്ടെടുത്തിട്ടുണ്ട്. എന്നാൽ സ്വർണം കണ്ണൂർ സംഘം ഭീഷണിപ്പെടുത്തി തട്ടിയെടുത്തതാണെന്ന അഷ്റഫിന്‍റെ മൊഴി പൊലീസ് വിശ്വാസത്തിലെടുത്തിട്ടില്ല. അഷ്റഫ് കണ്ണൂർ സംഘവുമായി ചേർന്ന് ഒത്തുകളിച്ചതാണെന്ന നിഗമനത്തിലാണ് അന്വേഷണസംഘം.
50,000 രൂപയും വിമാന ടിക്കറ്റും പ്രതിഫലം
മെയ് 26നാണ്‌ ദുബായിൽ നിന്ന് രണ്ട്‌ കിലോഗ്രാം സ്വർണവുമായി അഷ്റഫ് കരിപ്പൂരിൽ വിമാനമിറങ്ങിയത്. കൊടുവള്ളിയിലെ ഒരു സംഘത്തിന്റേതായിരുന്നു സ്വർണം. കൈമാറേണ്ട വ്യക്തിക്ക് ഇയാളുടെ ഫോട്ടോ അയച്ചുനൽകിയിട്ടുണ്ടെന്നും അവർ സമീപിക്കുമെന്നുമായിരുന്നു ഏജന്‍റ്‌ പറഞ്ഞത്.
50,000 രൂപയും വിമാന ടിക്കറ്റുമായിരുന്നു പ്രതിഫലം. വിമാനത്താവളത്തിന് പുറത്തെത്തിയ ഉടൻ ഒരു സംഘം സമീപിച്ചു. അവരുടെ കൂടെ വാഹനത്തിൽ കയറി. വാഹനം കൊടുവള്ളിക്ക് പോകുന്നതിനുപകരം നാദാപുരം ഭാഗത്തേക്ക് പോയപ്പോഴാണ് ചതി മനസ്സിലായത്. സ്വർണം തരില്ലെന്നുപറഞ്ഞപ്പോൾ മർദിച്ചു.
കൊടി സുനിയുടെ ശബ്ദസന്ദേശം
നാദാപുരത്തെ ഒരു വീട്ടിൽ കൊണ്ടുപോയി ഭീഷണിപ്പെടുത്തി. കൊടുവള്ളി സംഘം നൽകുന്ന 50,000 രൂപയ്ക്ക് പകരം 15 ലക്ഷം രൂപ നൽകാമെന്ന് അറിയിച്ചു. ഇത് സമ്മതിച്ചതോടെ വിട്ടയച്ചു. സ്വർണം വിറ്റതിന് ശേഷം പത്ത്‌ ലക്ഷം എത്തിച്ചുനല്‍കി. ഇതിനിടെ കൊടുവള്ളിയിൽ നിന്ന് സ്വർണത്തിന്‍റെ ഉടമകൾ ഫോണിൽ വിളിച്ച് ഭീഷണി ആരംഭിച്ചു.
read more: പ്രവാസിയെ തട്ടികൊണ്ടു പോയ സംഘത്തെക്കുറിച്ച് സൂചന ലഭിച്ചതായി പൊലീസ്
ഇത് കണ്ണൂർ സംഘത്തെ അറിയിച്ചപ്പോഴാണ് ഭീഷണിപ്പെടുത്തുന്നവർക്ക് അയച്ചുനൽകാൻ കൊടി സുനിയുടേതെന്ന് പറഞ്ഞ് ശബ്ദസന്ദേശം അയച്ചുനൽകിയത്. അതേസമയം തട്ടിക്കൊണ്ടുപോകൽ കേസിൽ പൊലീസ് അറസ്റ്റ് ചെയ്ത മൂന്ന്‌ പേരെ ഇന്ന് കൊയിലാണ്ടി കോടതിയിൽ ഹാജരാക്കും.
