കോഴിക്കോട്: അന്തരിച്ച മുന്‍ കൃഷി മന്ത്രി സിറിയക് ജോണിന്‍റെ (90) സംസ്‌കാരം ഇന്ന് (Former minister Cyriac John funeral). കോവൂരിലെ അപ്പാർട്ട്മെൻ്റിൽ ഇന്നലെയായിരുന്നു അന്ത്യം (Former Minister and Congress leader Cyriac John passes away). ഇന്ന് (01.12.23) രാവിലെ 10 മുതൽ 12 വരെ കോഴിക്കോട് ടൗൺ ഹാളിൽ ഭൗതിക ശരീരം പൊതു ദർശനത്തിന് വക്കും.
വൈകിട്ട് നാല് മണിക്ക് കട്ടിപ്പാറ ഹോളിഫാമിലി ചര്‍ച്ചില്‍ സംസ്‌കാരം നടക്കും. രണ്ട് വര്‍ഷമായി മറവി രോഗത്തെത്തുടര്‍ന്ന് ചികിത്സയിലായിരുന്നു. അന്നക്കുട്ടിയാണ് ഭാര്യ, അഞ്ച് മക്കളുണ്ട്. കൽപ്പറ്റ നിയമസഭാമണ്ഡലത്തിൽ നിന്നും കോൺഗ്രസ് പ്രതിനിധിയായി നാലാം കേരള നിയമസഭയിലും, തിരുവമ്പാടിയിൽ നിന്ന് കോൺഗ്രസിനെ പ്രതിനിധീകരിച്ച് അഞ്ച്, ആറ്, ഏഴ് നിയമസഭകളിലും അംഗമായി.
1982-83 കാലഘട്ടത്തിൽ കരുണാകരൻ മന്ത്രിസഭയിൽ കൃഷി വകുപ്പ് മന്ത്രിയുമായിരുന്നു. കേരളത്തില്‍ കൃഷി ഭവനുകൾ ആരംഭിച്ചത് സിറിയക് ജോൺ കൃഷിമന്ത്രി ആയ കാലത്താണ്. സഹകരണമേഖല സംഘടന രംഗത്ത് വളരെനാൾ പ്രവർത്തിച്ച സിറിയക് ജോണ്‍ താമരശ്ശേരി സർവീസ് സഹകരണ ബാങ്ക് പ്രസിഡന്‍റ്, കേരള സംസ്ഥാന മാർക്കറ്റിങ് സഹകരണ ഫെഡറേഷൻ പ്രസിഡന്‍റ്, ഇന്ത്യൻ റബ്ബർ ബോർഡംഗം എന്നീ നിലകളിലും പ്രവർത്തിച്ചു.
കെപിസിസി, കെപിസിസി എക്‌സിക്യൂട്ടീവ് അംഗം കർഷക കോൺഗ്രസ് സംസ്ഥാന പ്രസിഡന്‍റ്, എന്നീ പദവികളും വഹിച്ചിരുന്നു. കോൺഗ്രസിലും അതിനു ശേഷം എൻസിപിയിലും പ്രവർത്തിച്ച ഈ കുടിയേറ്റ കർഷക നേതാവ് പിന്നീട് കോൺഗ്രസിലേക്ക് തിരിച്ചെത്തുകയായിരുന്നു. മലയോര മേഖലയുടെ വികസനത്തിനായി ഏറെ പ്രയത്‌നിച്ച നേതാവ് 1970ലാണ് ആദ്യമായി നിയമസഭയിലേക്ക് കോൺഗ്രസ് ടിക്കറ്റിൽ മത്സരിച്ചത്.
കൽപ്പറ്റയിൽ കെ കെ അബുവിനെ തോൽപ്പിച്ചായിരുന്നു തുടക്കം. 1977ൽ തിരുവമ്പാടിയിൽ ഇ ടി മുഹമ്മദ് ബഷീറിനെതിരെ ജയിച്ചുകയറി. 1980ൽ ഇടതുമുന്നണിക്കൊപ്പം ആന്‍റണി കോൺഗ്രസ് സ്ഥാനാർഥിയായി ജയിച്ചു.
1982ൽ കോൺഗ്രസ്-ഐയിലേക്ക് തിരിച്ചുവന്ന് തിരുവമ്പാടിയിൽ ഹാട്രിക് വിജയം നേടി. കരുണാകരൻ മന്ത്രിസഭയിൽ 15 മാസം മന്ത്രിയുമായി. 1991ൽ തിരുവമ്പാടിയിൽ വീണ്ടും കോൺഗ്രസ് സിറിയക് ജോണിനെ പരിഗണിച്ചു. എന്നാൽ, തോൽവിയായിരുന്നു ഫലം.
1996ലും 2001ലും തോറ്റതോടെ തെരഞ്ഞെടുപ്പ് ഗോദയിൽ നിന്ന് പിന്മാറുകയായിരുന്നു. കോൺഗ്രസിൽ നിന്ന് തെറ്റി എൻസിപിയിലേക്ക് പോയ സിറിയക് ജോൺ സംസ്ഥാന പ്രസിഡന്‍റ് പദവിയിലേക്ക് വരെ ഉയർന്നു. എന്നാൽ, 2007ൽ ആയിരത്തോളം അനുയായികൾക്കൊപ്പം കോഴിക്കോട് നടന്ന പരിപാടിയില്‍ കോൺഗ്രസിലേക്ക് തിരിച്ചെത്തുകയായിരുന്നു.
ഏഴു തവണ നിയമസഭയിലേക്ക് മത്സരിച്ച സിറിയക് ജോണിന് പാർലമെന്‍ററി രാഷ്‌ട്രീയത്തിനൊപ്പം സഹകരണ മേഖലയിലും തിളങ്ങാനായിട്ടുണ്ട്. മാർക്കറ്റ് ഫെഡിനെ ഏറെ നാൾ നയിച്ചു. താമരശ്ശേരി സർവീസ് സഹകരണ ബാങ്ക് പ്രസിഡന്‍റ് പദവിയിലും ഏറെ നാൾ ഉണ്ടായിരുന്നു. കോവൂരിൽ മകന്‍റെ വീട്ടിൽ പൂർണ വിശ്രമത്തിലായിരുന്നു അദ്ദേഹം.
