കോഴിക്കോട്: കൊവിഡില്‍ (Covid Crisis) തൊഴില്‍ നഷ്‌ടമായി (Positive thinking) വിവിധ മേഖലകളിലേക്ക് ചേക്കേറിയവര്‍ നിരവധിയാണ്. മാവൂരിലെ ഒരു കൂട്ടം ആളുകള്‍ അല്‍പം വ്യത്യസ്‌തമായ മാര്‍ഗമാണ് തെരഞ്ഞെടുത്തത്. ആട് വളര്‍ത്തലയിരുന്നു (Goat Farming) അത്. നിര്‍മാണം, ബസ്, ലൈറ്റ് ആന്‍ഡ് സൗണ്ട്, കാറ്ററിങ്, കല തുടങ്ങിയ വിവിധ മേഖലകളില്‍ നിന്നുള്ളവരാണ് ആടുവളര്‍ത്തലിലേക്ക് തിരിഞ്ഞത്.
നൊട്ടിവീട്ടിൽ കാരിക്കുട്ടി അടക്കം 20ലധികം പേരാണ് ഇരുളടഞ്ഞെന്നു കരുതിയ ഭാവിയെ, ആത്മവിശ്വാത്തോടെ നേരിടുന്നത്. ചെറിയതോതിൽ തുടങ്ങി മുഴുവൻ സമയ തൊഴിലാക്കി മാറ്റുകയായിരുന്നു ഇവര്‍. കാരിക്കുട്ടി ഇരുപത് ആടുകളെയാണ് വളര്‍ത്തുന്നത്. കാടും പുല്ലും ഇടതൂര്‍ന്ന് നില്‍ക്കുന്ന മാവൂർപാടമാണ് ആടുകളെ മേയ്‌ക്കാന്‍ ഉപയോഗിക്കുന്നത്.
നല്ലൊരു ഹോബിയും തൊഴിൽ സാധ്യതയുമാണ് ആടുകൃഷിയെന്ന് കര്‍ഷകര്‍ സാക്ഷ്യപ്പെടുത്തുന്നു. വീട്ടിൽ ആവശ്യത്തിന് പാൽ എടുക്കുന്നതിെനാപ്പം വലിയൊരളവ് വിൽക്കാനും ഇവർക്ക് കഴിയുന്നു. വിലകൂടിയ ആടുകളെ വാങ്ങി നല്ല രീതിയിൽ ഫാമുകൾ നടത്തുന്നവരും ഈ രംഗത്തുണ്ട്. പ്രതിസന്ധികളില്‍ പതറാതെ മുന്നോട്ട് ചലിക്കാന്‍ ജനതയ്‌ക്ക് ഊര്‍ജമേകുകയാണ് ഈ നാടും കുറേ മനുഷ്യരും.
