കോഴിക്കോട് : മനുഷ്യാവകാശ പ്രവർത്തകൻ ഗ്രോ വാസുവിനെതിരായ ( Grow Vasu) കേസ് പരിഗണിക്കുന്നതിനിടെ പൊലീസിനെ താക്കീത് ചെയ്‌ത് കുന്ദമംഗലം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി. മുദ്രാവാക്യം വിളിക്കാന്‍ കോടതി വരാന്തയില്‍വച്ച് (Slogans in Court Premises) ആരേയും അനുവദിക്കരുതെന്ന് കോടതി പൊലീസിന് നിര്‍ദേശം നല്‍കി ). ഇനി ഇത് ആവര്‍ത്തിച്ചാല്‍ പൊലീസിനെതിരെ നടപടിയെടുക്കേണ്ടി വരുമെന്നും കോടതി താക്കീത് നൽകി (Court Cautioned police On Grow Vasu Case) .
കഴിഞ്ഞ തവണ ഗ്രോ വാസു കോടതി വരാന്തയില്‍ വച്ച് മുദ്രാവാക്യം വിളിച്ച പശ്ചാത്തലത്തിലായിരുന്നു കര്‍ശന നിര്‍ദേശം. കേസിലെ നാലാം സാക്ഷിയായ മെഡിക്കല്‍ കോളജ് പൊലീസ് സ്റ്റേഷനിലെ മുന്‍ സിപിഒ പി ജയചന്ദ്രനെ ഇന്ന് വിസ്‌തരിച്ചു. സാക്ഷി വിസ്‌താരം പൂര്‍ത്തിയാക്കിയ ശേഷം കേസ് വീണ്ടും പരിഗണിക്കുന്നതിനായി ഈ മാസം 11ലേക്ക് മാറ്റി.
ജാമ്യ സാധ്യത പരിശോധിക്കാൻ മുഖ്യമന്ത്രിക്ക് കത്തയച്ച് പ്രതിപക്ഷ നേതാവ് : അതേസമയം, ഗ്രോ വാസുവിനെതിരായ കേസ് പിന്‍വലിക്കണമെന്നാവശ്യപ്പെട്ട് പ്രതിപക്ഷ നേതാവ് വി.ഡി സതീശന്‍ (V D Satheesan) രംഗത്ത് വന്നിരുന്നു. ഗ്രോ വാസുവിന്‍റെ ജാമ്യത്തിന് നിയമപരമായ സാഹചര്യം ഉണ്ടാക്കണമെന്നും, അദ്ദേഹത്തോടുള്ള പൊലീസിന്‍റെ പെരുമാറ്റത്തില്‍ മനുഷ്യത്വപരമായ സമീപനം വേണമെന്നും ആവശ്യപ്പെട്ട് പ്രതിപക്ഷ നേതാവ് മുഖ്യമന്ത്രിക്ക് കത്തയച്ചിരുന്നു.
94 കാരനായ ഒരു മനുഷ്യാവകാശ പ്രവര്‍ത്തകന്‍ മുദ്രാവാക്യം വിളിക്കുന്നത് തടയാന്‍ അദ്ദേഹത്തിന്‍റെ കൈ ബലമായി പിടിച്ച് താഴ്ത്തുകയാണ് പൊലീസ് ചെയ്‌തതെന്നും വി ഡി സതീശൻ ആരോപിച്ചു. മനുഷ്യ ജീവനെടുത്തവരും രാഷ്‌ട്രീയ എതിരാളികളെ അരുംകൊല ചെയ്‌തവരും ആള്‍മാറാട്ടവും വ്യാജരേഖാ നിര്‍മാണവും നടത്തുന്ന സിപിഎം ബന്ധുക്കളും പൊലീസ് കസ്‌റ്റഡിയിലും ജയിലിലും രാജകീയമായി വാഴുന്നു.
അങ്ങനെയിരിക്കെ, മാവോയിസ്റ്റ് വേട്ടയെന്ന പേരില്‍ മനുഷ്യരെ തോക്കിന്‍ മുനയില്‍ നിര്‍ത്തി വെടിവച്ച് കൊന്നതിനെതിരെ പരസ്യമായി പ്രതികരിച്ചുവെന്ന കുറ്റത്തിന് ഗ്രോ വാസുവിനോട് ചെയ്യുന്നത് അനീതിയാണെന്നും പ്രതിപക്ഷ നേതാവ് കത്തിൽ പറഞ്ഞിരുന്നു.
ജാമ്യം വേണ്ടെന്ന് ഗ്രോ വാസു : നിയമസഭ അടിച്ച് തകര്‍ത്ത കേസ് അടക്കം പ്രമാദമായ നിരവധി കേസുകൾ എഴുതി തള്ളാൻ വ്യഗ്രത കാണിച്ച സർക്കാരിന് ഗ്രോ വാസുവിന്‍റെ പേരിലുള്ള കേസും പിന്‍വലിച്ചാല്‍ എന്താണ് കുഴപ്പമെന്നും അദ്ദേഹം കത്തിലൂടെ ചോദിച്ചിരുന്നു. പ്രായം പരിഗണിച്ച് ഗ്രോ വാസുവിനെ മജിസ്‌ട്രേറ്റ് കോടതി വെറുതെ വിട്ടിരുന്നെങ്കിലും രേഖകളിൽ ഒപ്പിടാൻ വിസമ്മതിക്കുകയും ജാമ്യം വേണ്ടെന്ന നിലപാടെടുക്കുകയും ചെയ്‌തതോടെ റിമാൻഡ് ചെയ്യുകയായിരുന്നു.
