കോഴിക്കോട് : കൂളിമാട് പാലത്തിന്‍റെ തകർന്നുവീണ ബീമുകൾ നീക്കുന്ന പ്രവര്‍ത്തനം പൂർത്തിയായി.ബീമുകൾ ഒന്നോ രണ്ടോ മീറ്ററുകൾ നീളത്തിൽ വലിയ കഷ്‌ണങ്ങളാക്കി തോട്ടുമുക്കത്തെ ക്രഷറുകളിലേക്ക് മാറ്റുകയായിരുന്നു. ക്രഷറിൽവെച്ച് ഇത് പൊടിക്കും.
കഴിഞ്ഞ ബുധനാഴ്‌ചയാണ് ബീമുകൾ മുറിച്ചുമാറ്റുന്ന പ്രവര്‍ത്തനം തുടങ്ങിയത്. എൻഗേഡറുകൾ സ്ഥാപിച്ച് ബീമുകൾ താങ്ങി നിർത്തിയ ശേഷമാണ് ഇവ മുറിച്ചുനീക്കിയത്. ഓഗസ്റ്റ് നാലിനുതന്നെ ബീമുകൾ മുറിക്കുന്ന ജോലി തുടങ്ങിയിരുന്നെങ്കിലും ചാലിയാര്‍ പുഴയില്‍ ജലനിരപ്പ് ഉയർന്നതോടെ നിർത്തിവയ്ക്കുകയായിരുന്നു.
പാലത്തിന്‍റെ മൂന്ന് ബീമുകൾ മെയ് 16നാണ് തകർന്നുവീണത്. ഒന്ന് പുഴയിലേക്കാണ് വീണത്. രണ്ടെണ്ണം മുകളിൽതന്നെ മറിഞ്ഞുവീഴുകയായിരുന്നു.
ബീമിന്‍റെ വെള്ളത്തിനടിയിൽ ഉള്ള ഭാഗം പ്രത്യേക സംവിധാനം വഴിയായിരിക്കും പിന്നീട് നീക്കുക. സമീപത്തെ ബീമുകൾക്കോ തൂണിനോ സ്ലാബുകൾക്കോ തകരാറുണ്ടോയെന്ന് പരിശോധിക്കുന്നതിന് തിരുവനന്തപുരം കെ.എച്ച്.ആർ.ഐ വിദഗ്‌ധസംഘം വെള്ളിയാഴ്‌ച സ്ഥലത്തെത്തും.
