കോഴിക്കോട്: കേരള പ്രദേശ് കോൺഗ്രസ് കമ്മിറ്റി (കെപിസിസി) സംഘടിപ്പിച്ച ദ്വിദിന ചിന്തൻ ശിബിരം സമാപിച്ചു. 2024 ലെ ലോക്‌സഭ തെരഞ്ഞെടുപ്പിന് പാർട്ടിയെ സജ്ജമാക്കുന്നതിനാണ് രാജസ്ഥാനിലെ ഉദയ്‌പൂരിൽ നടന്ന ദേശീയതല സമ്മേളനത്തിന് സമാനമായ രീതിയില്‍ ചിന്തന്‍ ശിബിരം സംഘടിപ്പിച്ചത്. സംഘപരിവാറിന്‍റെ ഹിന്ദുത്വ രാഷ്ട്രം എന്ന അജണ്ട രാജ്യത്തിന്‍റെ ജനാധിപത്യ തത്വങ്ങൾക്ക് എതിരാണെന്നും, കോൺഗ്രസ് അധ്യക്ഷ സോണിയ ഗാന്ധിയെയും രാഹുൽ ഗാന്ധിയെയും വേട്ടയാടുന്നതിലൂടെ എൻഫോഴ്‌സ്‌മെന്‍റ് ഡയറക്‌ടറേറ്റിനെ (ഇ.ഡി) രാഷ്ട്രീയ പകപോക്കലിന്‍റെ ഉപകരണമായി ഉപയോഗിക്കുകയാണെന്നും സമാപന സമ്മേളനത്തില്‍ കെപിസിസി അധ്യക്ഷൻ കെ സുധാകരൻ പറഞ്ഞു.
പ്രതികരിക്കുന്നവരെ എതിർക്കുക വഴി സംഘപരിവാറിന്‍റെ നയങ്ങൾക്ക് സമാനമായാണ് സംസ്ഥാനം ഭരിക്കുന്ന എൽഡിഎഫ് സര്‍ക്കാരും പ്രവര്‍ത്തിക്കുന്നതെന്ന് കെ സുധാകരൻ കുറ്റപ്പെടുത്തി. സ്വതന്ത്ര ചിന്തയും വ്യക്തിസ്വാതന്ത്ര്യവും സംസ്ഥാനത്തും രാജ്യത്തും ഭീഷണിയിലാണ്. മുഖ്യമന്ത്രി പിണറായി വിജയൻ നേരിടുന്ന തരത്തിലുള്ള ആരോപണങ്ങൾ രാജ്യത്തെ ഒരു മുഖ്യമന്ത്രിക്കെതിരെയും ഉണ്ടായിട്ടില്ലെന്നും കേന്ദ്രം ഭരിക്കുന്ന ബിജെപി സർക്കാരിന്‍റെ പിന്തുണ ഇല്ലായിരുന്നെങ്കിൽ അദ്ദേഹം ഇപ്പോൾ രാജിവക്കേണ്ടി വരുമായിരുന്നുവെന്നും സുധാകരന്‍ പറഞ്ഞു.
മുഖ്യമന്ത്രി നേരിടുന്ന ആരോപണങ്ങളിൽ നിന്ന് ശ്രദ്ധ തിരിക്കാനാണ് രാഹുൽ ഗാന്ധിയുടെ വയനാട്ടിലെ ഓഫിസ് അടിച്ചുതകർത്തതെന്നും അതിന് ശേഷം എകെജി സെന്‍ററിന് നേരെ ആക്രമണം നടത്തിയതെന്നും സുധാകരന്‍ ആരോപിച്ചു. അഖിലേന്ത്യ കോൺഗ്രസ് കമ്മിറ്റി (എഐസിസി) നൽകുന്ന നിർദേശങ്ങൾക്കനുസരിച്ച് പാർട്ടിക്കുള്ളിൽ പുനഃസംഘടന ഉണ്ടാകും. പുനഃസംഘടനയുടെ ഭാഗമായി ജില്ല മുതൽ ബൂത്ത് തലം വരെയുള്ള നേതൃത്വങ്ങളിൽ സ്ത്രീകൾക്കും ദളിതർക്കും പ്രാതിനിധ്യം നൽകും.
കൂടാതെ ഓരോ ജില്ലയിലും മണ്ഡലത്തിലും രാഷ്ട്രീയകാര്യങ്ങൾ ഉൾപ്പെടെ വിവിധ കമ്മിറ്റികൾ രൂപീകരിച്ച് പാർട്ടി പ്രവർത്തകർക്ക് പരിശീലനം നൽകുമെന്നും അദ്ദേഹം യോഗത്തിൽ പറഞ്ഞു. ഡിസിസി മുതൽ ബൂത്ത് തലം വരെയുള്ള നേതൃത്വം എഐസിസി ടൈംലൈൻ അനുസരിച്ച് തീരുമാനിക്കുമെന്ന് യോഗത്തിൽ പങ്കെടുത്ത പ്രതിപക്ഷ നേതാവ് വി.ഡി സതീശൻ പറഞ്ഞു. സംസ്ഥാനം ഭരിക്കുന്ന മുന്നണിക്കെതിരെ പാർട്ടി പ്രതിഷേധം തുടരുമോ എന്ന ചോദ്യത്തിന് പ്രസക്തമായ വിഷയങ്ങൾ മാത്രമാണ് തങ്ങൾ ഏറ്റെടുക്കുന്നതെന്ന് സതീശൻ പറഞ്ഞു.
സിൽവർലൈൻ സർവേ വിഷയം പാർട്ടി ഏറ്റെടുത്തെന്നും കോൺക്രീറ്റ് തൂണുകൾ സർവേക്കല്ലുകളായി ഉപയോഗിക്കാനുള്ള തീരുമാനം പിൻവലിക്കാൻ സംസ്ഥാന സർക്കാർ നിർബന്ധിതരാവുകയാണെന്നും അദ്ദേഹം പറഞ്ഞു. അതുപോലെ, ഡിപ്ലോമാറ്റിക് ബാഗുകൾ വഴിയുള്ള സ്വർണക്കടത്താണ് പാർട്ടി ഏറ്റെടുക്കുന്ന അടുത്ത വിഷയം, ഹൈക്കോടതിയുടെ മേൽനോട്ടത്തിൽ സിബിഐ അന്വേഷണം വേണമെന്ന ആവശ്യം അംഗീകരിക്കുന്നതുവരെ അതുമായി ബന്ധപ്പെട്ട് പ്രതിഷേധം തുടരുമെന്നും പ്രതിപക്ഷ നേതാവ് വ്യക്തമാക്കി.
ദിഗ്‌വിജയ സിംഗ്, താരിഖ് അൻവർ, മുൻ പ്രതിപക്ഷ നേതാവ് രമേശ് ചെന്നിത്തല, മുൻ മുഖ്യമന്ത്രി ഉമ്മൻ ചാണ്ടി, മറ്റ് പാർട്ടി എംപിമാർ എന്നിവരും ചടങ്ങിൽ പങ്കെടുത്തു. കെപിസിസി അംഗങ്ങളും ജില്ല കമ്മിറ്റി പ്രസിഡന്‍റുമാരും ഉൾപ്പെടെ ഇരുന്നൂറോളം പ്രതിനിധികളാണ് ചിന്തന്‍ ശിബിരത്തില്‍ പങ്കെടുത്തത്.
