കോട്ടയം: കിടങ്ങൂര്‍ കാവാലിപ്പുഴയില്‍ പ്ലസ്‌വൺ വിദ്യാര്‍ഥി മുങ്ങിമരിച്ചു. അതിരമ്പുഴ സ്വദേശി ആഷിക് ഷിയാസാണ് മുങ്ങിമരിച്ചത്. ആര്‍പ്പൂക്കര ഗവണ്മെന്റ് ഹയര്‍സെക്കന്‍ഡറി സ്‌കൂളിലെ വിദ്യാര്‍ഥിയാണ്. പുഴയില്‍ ഫ്ലിപ്പിങ് പരിശീലനത്തിനിടെയായിരുന്നു അപകടം. ആറ്റിൽ ഇറങ്ങുന്നതിനും ആറിന്റെ മധ്യ ഭാഗത്തേക്ക് നീന്തുന്നതിനും വിലക്ക് ഏര്‍പ്പെടുത്തിയിരുന്നു. എന്നാൽ ഈ വിലക്ക് ലംഘിച്ചാണ് കുട്ടികൾ നീന്താനിറങ്ങിയത്.
ആഷിക്കിന്റെ ഒപ്പമുണ്ടായിരുന്ന സുഹൃത്തുക്കളുടെ ബഹളം കേട്ട് ഓടിക്കൂടിയ നാട്ടുകാരാണ് പൊലീസിലും അഗ്നിരക്ഷാ സേനാ അധികൃതരെയും വിവരം അറിയിച്ചത്. പൊലീസും അഗ്നിരക്ഷാ സേനയും സ്ഥലത്ത് എത്തി രക്ഷാപ്രവർത്തനം നടത്തി. എന്നാൽ, ഒരു മണിക്കൂര്‍ നേരത്തെ തിരച്ചിലിനൊടുവില്‍ ഉച്ചക്ക് ഒന്നരയോടെ കുട്ടിയുടെ മൃതദേഹം കണ്ടെത്തുകയായിരുന്നു. മൃതദേഹം പാലാ ജനറൽ ആശുപത്രി മോർച്ചറിയിലേക്ക് മാറ്റി. പോസ്റ്റ്‌മോർട്ടത്തിന് ശേഷം മൃതദേഹം നാളെ ബന്ധുക്കൾക്ക് വിട്ടു നൽകും.
