കോട്ടയം: വൈക്കം തലയാഴത്ത് അയൽവാസിയുടെ വെടിയേറ്റ വളർത്തു പൂച്ച ചത്തു. ചൊവ്വാഴ്ച രാത്രിയാണ് പൂച്ച ചത്തത്. വെടിവയ്പ്പിൽ കരളിൽ മുറിവും കുടലിന് ക്ഷതവും ഏറ്റിരുന്നു. ഇതിനെ തുടർന്നായിരുന്നു ചത്തത്.
ഞായറാഴ്ചയായിരുന്നു സംഭവം. തലയാഴം സ്വദേശികളായ പാരണത്ര വീട്ടിൽ രാജുവും സുജാതയും വളർത്തുന്ന എട്ടുമാസം പ്രായമുള്ള ചിന്നുക്കുട്ടി എന്ന വളർത്തു പൂച്ചയ്‌ക്കാണ്‌ വെടിയേറ്റത്‌. തൻ്റെ പ്രാവിനെ ആക്രമിച്ചെന്ന് ആരോപിച്ച് അയൽവാസി രമേശൻ പൂച്ചയെ വെടിവയ്ക്കുകയായിരുന്നു. സംഭവത്തിൽ പൊലീസ് സ്വമേധയാ കേസെടുത്തു. ദമ്പതികളും പോലീസിൽ പരാതി നൽകിയിരുന്നു.
READ MORE:ഇതും നമ്മുടെ നാട്ടിലാണ്... പ്രാവിനെ പിടിക്കുമെന്ന പേരില്‍ പൂച്ചയെ വെടിവെച്ചുകൊല്ലാൻ ശ്രമം
കോട്ടയം മ്യഗാശുപത്രിയിലെ ചികിത്സയ്ക്ക് ശേഷം ചൊവ്വാഴ്ച പൂച്ചയെ തൃപ്പൂണിത്തുറയിലെ മ്യഗാശുപത്രിയിൽ എത്തിച്ച് ശസ്ത്രക്രിയ നടത്തി. ശസ്ത്രക്രിയയിൽ വെടിയുണ്ട പൂച്ചയുടെ ശരീരത്തിനുള്ളിൽ നിന്ന് കണ്ടെടുത്തു. ഇത് പൊലീസിൽ ഏൽപ്പിച്ചു. പൂച്ചയെ തിരികെ വീട്ടിലെത്തിക്കുകയും ചെയ്തു. എന്നാൽ ചൊവാഴ്ച രാത്രി പത്ത് മണിയോടെ പൂച്ച ചത്തു. അതേസമയം വെടിവച്ച അയൽവാസി രമേശൻ ഒളിവിലാണ്. ഇയാളുടെ വീട്ടിലെത്തി പൊലീസ് തോക്ക് സ്റ്റേഷനിലേക്ക് കൊണ്ടുപോയി.
